Qostanaı ákimi merdigerlerden joldy óz qarjysyna jóndeýdi talap etti
QOSTANAI. QazAqparat - Qostanaı ákimi Bazyl Jaqypov ótken jyly qurylysshy-merdigerler bergen kepildik boıynsha joldaǵy aqaýlardy jóndep, jol jóndeý barysynda durys istelmegen jerlerdi rettep berýdi talap etti, dep habarlaıdy «QazAqparat» HAA tilshisi.
Oblys ortalyǵynyń basshysy qaladaǵy jańadan jóndelgen joldardyń sapasyzdyǵyn alǵa tartyp, merdiger uıymdarǵa narazylyq bildirdi. Ásirese, qalanyń ortalyq aýdandaryndaǵy joldardy jóndegen «Taza Jol AT» JShS kompanııasynyń jumysyn synǵa aldy. Ákimniń pikirinshe, merdiger uıym endi bul aqaýlardy óziniń qarjysy esebinen jóndeýge mindetti.
«2016 jyly qalanyń kósheleri men joldaryn jóndeý úshin 4 mıllıard teńge bólindi, - dedi Bazyl Jaqypov. - Biz ol qarjyny túgeldeı ıgerip, jóndeý jumystaryn júrgizdik. Biraq, merdigerler barlyq joldy sapaly jóndemedi. Bul olardyń kinási, endi ony ózderi túzetýi tıis. Onyń bárin óz qarjysy esebinen túzetýi kerek! Joldaǵy oıyqtar, jarylǵan jerlerdi jóndeýi kerek! Jáne bul jumystardy keıinge qaldyrmaı, mamyr aıynyń basynda aıaqtaýy qajet».
Qala ákimi Jaqypov málimdegendeı, olar jol jóndeý kezinde oblys ortalyǵyndaǵy kólik keptelisine jol bermeýi kerek.
«Jol jóndeý jumystary kezinde naqty jol kartasyn jasap, kólik keptelisi týyndamas úshin eki qatar turǵan kósheni jabýǵa bolmaıdy», - dep tapsyrma berdi Bazyl Jaqypov qolastyndaǵylarǵa.
