Qostanaı ákimi mashına qurastyrýshylarǵa qurmet kórsetti
QOSTANAI. QazAqparat - 28 qyrkúıek mashına qurastyrýshylar kúni. Aıtýly merekege oraı Qostanaı oblysynyń ákimi Arhımed Muhambetov birqatar kólik óndirýshige qurmet gramotasyn tapsyrdy, dep habarlaıdy QazAqparat tilshisi.
Mashına jasaý salasy - el ekonomıkasyn alǵa ilgeriletýshi jetekshi faktor. Qostanaıdaǵy «SaryArqaAvtoProm» zaýyty - Qazaqstandaǵy mashına jasaý isiniń negizgi óndiris alańy. Óndiris oshaǵy shet elderdegi iri kompanııalarmen tyǵyz qarym-qatynas ornatyp, tehnıkalyq jetistikterdi meńgerip keledi. Bul týraly Qostanaı oblysynyń ákimi Arhımed Muhambetov aıtty.
«Dızel zaýyty 80 jyldardyń sońynda salyndy. Biraq keshegi toqyraý kezinde bul kásiporyn jabylyp, júzdegen adam jumyssyz qaldy. Memlekettiń qoldaýy arqasynda, 2010 jyly «SaryArqaAvtoProm» AQ eldegi qarqyndy damýshy kásiporyndardyń birine aınaldy. Qazir biz Qytaı, Reseı, Ózbekstan sııaqty eldermen tyǵyz baılanystamyz. Sońǵy jeti jyl ishinde oblysta 30 myń avtokólik qurastyrdy. Kóliktiń keıbir bólshekterin zaýyt ózi shyǵarady. Búginde onyń úles salmaǵy 33%-ǵa jetti. Osy jolda aıanbaı eńbek etip kele jatqan kólik qurastyrýshylardy tól merekelerimen quttyqtaımyn!» - dedi óńir basshysy.
Jıynda kásiporyn jumysshylaryna gramotalar men baǵaly syılyqtar tabys etildi. Mereke ıelerin oblystyq fılarmonııanyń ánshileri quttyqtady.
