Qostanaı ákimi: Áleýmettik azyq-túliktiń basym bóligi ózimizde óndiriledi
«Bizdiń aldymyzda ósimdik sharýashylyǵy men mal sharýashylyǵy ónimderin óndirýdi ulǵaıtý mindeti tur. 2023 jyldyń qańtar-mamyr aılarynda ónimniń jalpy shyǵarylymy 106,9 mlrd teńgeni qurady, naqty kólem ındeksi – 104,1%. Salaǵa 44% ósimimen 35 mlrd teńge ınvestıtsııa tartyldy. Negizgi áleýmettik mańyzy bar azyq-túliktiń, tuz, kúrish jáne qantty qospaǵanda, qalǵany ózimizde óndiriledi», - dedi Q. Aqsaqalov elordada Ortalyq kommýnıkatsııalar qyzmetinde ótken baspasóz máslıhatynda.
Sonymen birge, óńir basshysy jyl saıyn kóbirek ónim shyǵarý mindetin alǵa qoıǵanyn jetkizdi.
«Mysaly, bıyl maıly daqyldar egisi 750 myń gektardy qurady. Jarma alqaptary 5,8%-ke, onyń ishinde qaraqumyq 8,1%-ke ulǵaıtyldy. Bizdiń kelesi mindetimiz – mal sharýashylyǵyn damytý. Sút jáne sút ónimderi boıynsha ımport úlesin azaıtyp, ózimizdiń óndiristi ulǵaıtý maqsatynda aldaǵy ýaqytta 20-dan astam ónerkásiptik taýar-sút fermasyn salý josparlanýda», - dedi ákim.
Onyń aıtýynsha, keleshekte jyl saıyn eń kemi 10 jańa taýar-sút fermasyn salý josparlanǵan.
«Jobalardy iske asyrýǵa 100 mlrd teńgege jýyq ınvestıtsııa tartylady, 800-den astam jańa jumys orny ashylady. Osy 20 taýar-sút fermasy bar sharýashylyqtarda ónim kólemi 30%-ke ulǵaıatyn bolady jáne sút óńdeýshi zaýyttardyń qosymsha júktemesi 70%-ten 86%-ke deıin ósedi», - dedi Qumar Aqsaqalov.
