Qostanaı ákimdiginiń burynǵy laýazymdy tulǵalaryna qatysty sot úkimi shyqty
ASTANA. Búgin Qostanaı qalasynyń № 2 sotynda jemqorlyqqa qatysty atyshýly qylmystyq isterdiń biri boıynsha sot úkimi shyqty. Bul týraly Qostanaı oblystyq sotynyń baspasóz qyzmeti habarlady.
Sottalýshylardyń arasynda qala ákiminiń burynǵy orynbasary F. Arakelıan, «Qostanaı qalasy ákimdiginiń turǵyn úı-kommýnaldyq sharýashylyq, jolaýshylar tasymaly jáne avtomobıl joldary» bóliminiń burynǵy basshysy J.Shınkın, «SMÝ-2010» JShS-nyń dırektory A.Bobrovnyı bar.
Kóp epızodty qylmystyq is 17 tomnan quraldy.
Іsti qarastyrý qorytyndylary boıynsha, sot sottalýshylardy kináli dep tanydy. Qala ákiminiń burynǵy orynbasary Frýnzık Arakelıan sot QR QK-niń 366-babynyń 3-bólimindegi 2-tarmaǵy boıynsha múlkin tárkileýmen birge 7 jyl bas bostandyǵynan aıyrý jazasyn taǵaıyndady. Sondaı-aq ol ómiriniń sońyna deıin memlekettik qyzmette qyzmet atqarý quqyǵynan aıyryldy. Sottalýshy jazasyn jalpy rejimdegi túzeý abaqtysynda óteıdi. Sondaı-aq sot Arakelıandy memleket paıdasyna zańsyz ıelengen 300 myń teńge kólemindegi aqshalaı qarajatty tóletedi.
Jeńis Shınkındi sot QR QK-niń 24-babynyń 3-bólimi, 189-baptyń 4-bóliminiń 2-tarmaǵy, 366-babynyń 3-bóliminiń 2,4-tarmaqshalary, 367-babynyń 2-bólimi, 364-babynyń 2-bólimimen qarastyrylǵan quqyq buzýshylyqtardy jasaýda aıypty dep tanyp, oǵan múlkin tárkileýmen birge jalpy rejımdegi túzeý abaqtysynda 9 jylǵa bas bostandyǵynan aıyrý jazasyn taǵaıyndady. Budan basqa, sot Shınkınnan memleket paıdasyna 1 500 000 teńgeni óndirdi.
Aleksandr Bobrovnyıdy sot QR QK-niń 24-babynyń 3-bólimi, 189-babynyń 4-bólimi, 2-tarmaqshasymen qarastyrylǵan qylmystyq quqyq buzýshylyqtardy jasaýda aıypty dep tanyp, oǵan múlkin tárkileýmen birge jalpy rejımdegi túzeý abaqtysynda 7 jylǵa bas bostandyǵynan aıyrý jazasyn shyǵardy. Sondaı-aq ol ómiriniń sońyna deıin kommertsııalyq uıymdarda basshylyq qyzmetterdi atqarý quqyǵynan aıyryldy.
Osy kúnge deıin úı qamaýynda bolǵan Bobrovnyı sot zalynda qamaýǵa alyndy.
Budan basqa, sot J.Shınkın men A.Bobrovnyıdan «Qostanaı qalasy ákimdiginiń TÚKSh, JK jáne AJ bólimi» MM-niń paıdasyna 10 mln astam teńge kóleminde shyǵyn somasyn óndirip aldy.
Sot úkimi zańdy kúshine engen joq. Sottalýshylar oǵan joǵary ınstantsııada shaǵymdana alady.
