Qostanaı ákimdigi merekelik sharalarǵa bólinetin qarjyny qysqartýdy usyndy
Búginde Qostanaı oblysynda 854 úkimettik emes uıym tirkelgen. Alaıda, onyń ishinde jumys istep turǵany - 602. 2018 jyly tirkeýdegi 1001 uıymnyń 609-y is júzinde bolǵan edi. Bul kórsetkishtiń azaıýy ÚEU bólinetin qarjyny únemdeýge sep boldy.
«Bıyldan bastap áleýmettik mańyzdy jobalardy iske asyrý merzimi 1 jyldan 2 jylǵa deıin uzartylady. Bul jumystyń tıimdiligin arttyrady. ÚEU ókilderi bastaǵan sharýany tolyǵymen aıaqtaýǵa múmkindik alady. Sonymen qatar memlekettik áleýmettik tapsyrys aıasynda bólinetin qarajat merekelik is-sharalardy ótkizýge emes, qoǵamdyq mańyzy bar jobalarǵa jáne áleýmettik máselelerdi sheshýge baǵyttalsyn. Osyny eskerý qajet», - dep tapsyrdy oblys ákiminiń orynbasary Marat Júndibaev ÚEU basshylaryna.
Jalpy, 2019 jyly oblysta memlekettik áleýmettik tapsyrys aıasynda 285 joba júzege asyrylmaq. 164 joba boıynsha kelisimder jasaldy. 19 jobaǵa áli kúnge deıin baıqaý jarııalanbady. Sonyń 8-i bilim basqarmasyna tıesili. Halyq arasyndaǵy osyndaı yntaly toptardyń jobasyn iske asyrýǵa memleket qazynasynan qomaqty qarajat bólinedi. Bıyl 473 mln teńge qarastyryldy. Qarjylandyrý kólemi jyl saıyn tek artyp keledi. Endigi maqsat - jobalardyń sapasyna basymdyq berý. Oblys ákiminiń orynbasary Marat Júndibaev osyndaı tapsyrma júktedi.
Mundaı usynysty Arqalyq qalasyndaǵy qoǵamdyq birlestikter tolyǵymen quptaıdy. Sebebi, jumys tıimdiligi artady. Qarajat ysyrap bolmaıdy.
«Ońtústik aımaqtarda 51 úkimettik emes uıym bar, onyń 31-i ǵana turaqty jumys istep tur. Byltyr áleýmettik ıdeıalar men jobalar jármeńkesinde 8 joba úzdik dep tanylyp, qarjymen qamtyldy. Jyl basynan beri aýyldyq resýrstyq ortalyǵynyń qyzmetin uıymdastyrdyq», - dedi «Іsker jastar keńesi» qoǵamdyq birlestiginiń atqarýshy dırektory Darhan Kıkımov.
ÚEU-men ózara is-qımyl jónindegi úılestirý keńesiniń qorytyndysy boıynsha, osy saladaǵy jumystardy odan ári jetildirý jóninde usynystar qabyldandy.
