Qostanaı ákimdigi kıiz úı lagerin qolǵa almaq
«Rýhanı jańǵyrý» baǵdarlamasynyń júzege asqanyna eki jyldan astam ýaqyt ótti. Sol ýaqyt aralyǵynda óńirde qoǵamdyq sanany jańǵyrtý baǵytynda túrli jobalar qolǵa alynyp, aýqymdy jumystar atqarylýda. Ár toqsan saıyn oblys ákimdiginiń janyndaǵy konsýltatıvti keńesshi organ qoǵamdyq májilis ótkizip turady.
Búgingi kezdesý oblys ákiminiń orynbasary Marat Júndibaevtyń tóraǵalyǵymen ótti. Basqosýǵa qatysqandar baǵdarlama aıasynda atqarylǵan isterdi talqylap, keleshekte qolǵa alynatyn bastamalardy qarastyrdy.
«Qostanaı oblysynda «Rýhanı jańǵyrý» baǵdarlamasyn dáripteý maqsatynda «Týǵan jer» arnaıy jobasy jumys isteıdi. «Atameken» baǵdarlamasy aıasynda 4 joba qolǵa alynǵan. Olar: «Kórkeıe ber, Qostanaı!», «Jomart júrek», «Rahmet saǵan, týǵan el!» jáne oblystyq resýrstyq ortalyq. Bıyl óńirdi damytý maqsatynda 5 mlrd 693 mln teńgege 182 joba júzege asyryldy. Sonyń ishinde 137 shara tolyq aıaqtaldy. Bul bastamalardyń deni halyqtyń ál aýqatyn jaqsartýdy kózdeıdi. Osy jyly oblystyń 14 óńirinde 29 balalar alańy salyndy. Onyń syrtynda saıabaqtar qalpyna keltirilip, qanshama mektep jóndeýden ótip, robototehnıka kabınetteri ashyldy», - deıdi oblystyq ishki saıasat basqarmasynyń basshysy Záýre Báımenova.
Basqarma basshysynyń sózinshe, sońǵy úsh jyl ishinde oblysta 471 joba júzege asyp, 10 mlrd teńgeden astam qarjy ıgerilgen. Áleýmettik jobalardy ıgerýge úles qosqan metsenattardyń da qatary artyp keledi. Jastar arasynda, ÚEU boıynsha da «Rýhanı jańǵyrý» baǵdarlamasy boıynsha atqarylyp jatqan ister az emes.
«Atqarylǵan jumystarǵa jaqsy baǵa berýge bolady. Metsentattar qatary da artyp keledi. Ár aýdanda aýyz toltyryp aıtarlyqtaı ister bar. Qolǵa alǵan jobalarǵa qansha qarajat bólinse de, bastysy olar tıimdi jumsalýy kerek. Keler jyly eriktiler jyly dep otyrmyz. Muny da tıimdi paıdalan bilgenimiz jón. Ár salada kórneki isterdi júzege asyrý kerek. Bul oraıda memlekettik tapsyryspen de jumys isteýge bolady. Mysaly, Naýyrzym aýdany kıiz úı lagerin qolǵa alýdy usynǵan edi. Menińshe bul tamasha bastama. Biz qoldaımyz. Balalar úshin qyzyqty bolady dep oılaımyn. Endigi jerde keler jylǵa degen naqty usynystar jeltoqsan aıyna deıin ázir bolýy tıis», – dedi M.Júndibaev.
