Kosta-Rıka ókili BUU Bas hatshysy qyzmetin atqaratyn alǵashqy áıel bolýy múmkin
ASTANA. KAZINFORM — Kosta-Rıkanyń burynǵy vıtse-prezıdenti jáne BUU Saýda jáne damý jónindegi konferentsııasynyń (ıÝNKTAD) qazirgi prezıdenti Rebeka Grınspan kútpegen jerden BUU Bas hatshysy laýazymyna úmitker retinde kósh bastady, dep habarlaıdy The Guardian.
Jabyq ótken birinshi aldyn ala daýys berýde BUU Qaýipsizdik keńesiniń bes turaqty jáne on turaqty emes múshesi ár kandıdat boıynsha óz ustanymyn anyqtaýy kerek boldy — qoldaý, qarsylyq bildirý nemese únsiz qalý.
Saýalnama barysynda Kosta-Rıkanyń burynǵy vıtse-prezıdenti múmkin 15 daýystyń 10-yna ıe boldy. Grınspan sondaı-aq qatar tórt «pikir joq» jáne bir «qarsy» daýys aldy. Onyń kandıdatýrasyna kim qarsy shyqqany habarlanǵan joq.
Saılanǵan jaǵdaıda ol BUU Bas hatshysy qyzmetin atqaratyn alǵashqy áıel bolady.
Grespannyń eń jaqyn qarsylasy Gaıananyń BUU janyndaǵy burynǵy elshisi Kerolaın Rodrıges-Bırkett boldy, ol Qaýipsizdik keńesi músheleriniń toǵyz daýysyn aldy.
The Guardian jazýynsha, Chılıdiń burynǵy prezıdenti Mıshel Bacheletti qosa alǵanda taǵy úsh kandıdat yqpaldy qatysýshylardyń aıtarlyqtaı qarsylyǵyna tap bolǵan bolýy múmkin, sondyqtan olardyń saılaný múmkindigi óte az.
BUU-nyń qazirgi Bas hatshysy Antonıý Gýterrısh ekinshi besjyldyq merzimin 2026 jyldyń 31 jeltoqsanynda aıaqtaıdy. Aımaqtyq rotatsııanyń qalyptasqan beıresmı tájirıbesine sáıkes, onyń murageri Latyn Amerıkasynyń ókili bolady dep shamalanyp otyr. Uıymnyń jańa basshysy jyl sońyna deıin saılanýy tıis, al kandıdattar boıynsha negizgi sheshimder qazan aıynda qabyldanady dep kútilip otyr.
Bas hatshy bolyp saılaný úshin kandıdat Qaýipsizdik keńesinen keminde toǵyz daýys alýy jáne bes turaqty múshe — Reseı, AQSh, Qytaı, Ulybrıtanııa jáne Frantsııa — eshqaısysynyń vetosyna tap bolmaýy kerek. Qaýipsizdik keńesiniń usynysy boıynsha kandıdatty quramyna 193 memleket kiretin BUU Bas Assambleıasy maquldaýy tıis.
Buǵan deıin Sýshıla Karkı Nepaldyń alǵashqy áıel premer-mınıstri bolǵanyn jazdyq.
