«Kosta Konkordıa» kemesiniń bortynda bolǵan Qazaqstan azamattarynyń jaǵdaılary qalypty - SІM
ASTANA. 23 qańtar. QazAqparat /Aıdar Ospanalıev/ -«Qazaqstan Respýblıkasynyń Syrtqy ister mınıstrligi elimizden tysqary turyp jatqan jáne shet memleketterde júrgen azamattaryna kómek kórsetýdi jalǵastyrýda», - dedi búgin Syrtqy ister mınıstrliginiń resmı ókili Altaı Ábıbýllaev jýrnalıstermen bolǵan brıfıngte.
Onyń derekterine qaraǵanda, «Kosta Konkordıa» kemesiniń bortynda Qazaqstannyń 3 azamaty bar degen habar túskennen keıin-aq konsýldyq qyzmetkerleri olarmen baılanys ornatty. Qazaqstan Respýblıkasy azamattaryna kómek kórsetý úshin jáne kemede Qazaqstannyń ózge de azamattarynyń bar-joǵyn anyqtaý úshin konsýldyq qyzmetkerleri Monte-Ardjentarıo qalasyna attandy.
Nátıjesinde, osy oqıǵanyń saldarynan zardap shekken taǵy 4 azamattyń aty-jónderi belgili bolyp, olar jóninde qosymsha málimetter alyndy. Olar - Rýstam, Ageev, Lola Ageeva, Vıktorııa Barbasheva, Kıra Rıadnova, Aleksandr Korsýnskıı jáne Natalıa Kornsýnskaıalar. Atalǵan azamattardyń hal-jaǵdaılary qanaǵattanarlyq, densaýlyqtaryna zııan kelmegen.
