Qosshydaǵy jaryq problemasy: Nur Otan aýdan ákimdigine máseleni 25 qarashaǵa deıin retteýge keńes berdi

NUR-SULTAN. QazAqparat – Nur Otan partııasy ótkizgen praımerız jeńimpazdarynyń biri Qosshydaǵy jaryq máselesin jeke baqylaýyna aldy, dep habarlaıdy QazAqparat tilshisi partııanyń baspasóz qyzmetine silteme jasap.

Aıta ketsek, jaqynda Qosshydaǵy «Altyn orda» jáne «Dıamand» turǵyn úı keshenderinde jaryqtyń sónip, tarıftiń kóterilýine baılanysty halyq aýyldaǵy Respýblıka kóshesin jaýyp, narazylyq bildirgen bolatyn. Ondaǵy halyq atalǵan turǵyn úı keshenderinde jaryqty kılovatyna 26,7 teńgeden tólep jatqanyna narazy. Osynyń saldarynan bir úıdiń ózinde jaryq tarıfiniń aılyq tólemi 10 myń teńgeden asyp ketken. Odan bólek jaryqtyń jıi sónip qalýy da azamattardyń ábden mazasyn ketirgen. Sebebi atalmysh turǵyn úılerdegi jylý batareıasy da toqqa qosylǵan. Kóbiniń balalary qashyqtan oqyp jatyr.

Bul máseleni retteý úshin «Nur Otan» partııasy ótkizgen aımaqtyq praımerızdiń jeńimpazy Pavel Bezverbnyı Tselınograd aýdanynyń partııalyq komıssııasymen birge otyrys ótkizgen. Otyrystyń qorytyndysy boıynsha máseleni qadaǵalaı almaǵany úshin Tselınograd aýdany ákiminiń orynbasary Qanat Aǵzamuly «sógis» túrindegi partııalyq jaýapkershilikke tartylǵan.

Sonymen qatar aýdandyq ákimdikke atalmysh turǵyn úılerdiń ár turǵynymen «AREK» JShS arasyndaǵy kelisimshartty jasaý jumysyn osy jyldyń 25 qarashasyna deıin retteýge keńes berilip otyr.

«Atalmysh másele partııanyń oblystyq fılıalynyń nazarynda», - dep sendiredi partııanyń baspasóz qyzmetinen.