Qosshydaǵy úleskerler kópten kútken páterlerin aldy
Baspanaly bolǵandardyń basym kópshiligi «Ál Barakat kompanııasy» jaýapkershiligi shekteýli seriktestiginen zardap shekken úleskerler, ıaǵnı jas otbasy, kópbalaly ana, memlekettik jáne bıýdjettik sala qyzmetkerleri, zeınetkerler men múmkindigi shekteýli jandar.
«Ál Barakat kompanııasy» seriktestigi Qosshy kentinde turǵyn úı salý maqsatynda ekinshi naryqtan 15,5045 gektar jer telimin satyp alǵan. Kompanııa 2014 jyly úleskerlerden aldaý arqyly, ıaǵnı turǵyn úı jobasy men qurylysy úshin ruqsat qujatynsyz aqsha jınaǵan. Keıin 2015 jyly aqpan jáne shilde aılary aralyǵynda «Quryltaı» turǵyn úı kesheniniń 400 ınvestoryn quraıtyn bastamashylyq top jergilikti atqarýshy organdarǵa júginip, atalmysh úıdi salýǵa ruqsat alýǵa kómektesýdi surady. Óıtkeni, bulardyń kóbi osy turǵyn úıdiń qurylysy úshin qyrýar qarjy jumsaǵan.
Merdigerlerdiń aramza áreketinen zardap shekken Qosshy kentindegi «Jaılaý» turǵyn úı kesheniniń úleskerleri atalmysh úıdiń qurylysyn aıaqtaý úshin «Jaılaý city» turǵyn úı qurylys kooperatıvin qurǵan. Aqmola oblysynyń mamandandyrylǵan ekonomıkalyq sotynyń sheshimimen jer telimi «Ál Barakat kompanııasy» seriktestiginiń áreketinen aldanyp qalǵan turǵyn úı qurylys kooperatıvterine berildi. Jergilikti atqarýshy organdar «Tabys-Kuryltaı» jáne «Jaılaý city» turǵyn úı qurylys kooperatıvteriniń jer telimine zańdy ıelik etetin qujattaryn rásimdedi. Oblys jáne aýdan ákimdigi tarapynan jeke turǵyn úı qurylysynyń bas jospary kóp qabatty turǵyn úı salý úshin ózgertildi.
Jergilikti atqarýshy organdardyń birlesken kúshimen turǵyn úı qurylys kooperatıvi jáne «TurǵynÚıQurylys» seriktestigi (atalmysh seriktestikterdiń basshylary «Jaılaý city» turǵyn úı qurylys kooperatıviniń úleskeri bolyp tabylady) qurylystyń 7-shi sektsııasyn aıaqtady. «Nurly jer» turǵyn úı qurylys baǵdarlamasy sheńberinde eki nysandy ınjenerlik jelimen qamtamasyz etý úshin bıýdjet esebinen qarjy bólinip, 0,884 shaqyrym sýqubyry, 0,722 shaqyrym káriz jáne 2 x 1826 metr syrtqy elektrmen jabdyqtaý jelileriniń qurylysy aıaqtaldy.
Jańa páterdiń kiltin tapsyrý saltanatyna oblys ákiminiń orynbasary Málgajdar Tátkeev, aýdan basshylary men turǵyndary qatysty.