Qosshydaǵy sý máselesi: Oblys ákimi atqarylyp jatqan jumystarmen tanysty
KÓKShETAÝ. QazAqparat - Aqmola oblysynyń ákimi Ermek Marjyqpaev jumys saparymen Tselınograd aýdanynda boldy, dep habarlaıdy QazAqparat tilshisi ákimdiktiń baspasóz qyzmetine silteme jasap.
Vedomstvonyń málimeti boıynsha, sapar barysynda aımaq basshysy Qosshy aýyly turǵyndaryn aýyz sýmen qamtamasyz etý boıynsha atqarylyp jatqan jumystarmen tanysty. QR Prezıdentiniń tapsyrmasyna sáıkes Aqmola oblysy ákimdigi men QR Úkimeti birlesip jumys algorıtmin jasady.
Belgili bolǵandaı, sáýirdiń 7-de erigen qar sýynyń kóbeıýi jáne Qaraǵandy oblysyndaǵy sý qoımasynan sý aǵyzý saldarynan Nura ózeni arnasynan asyp Qosshy aýyly aýmaǵyndaǵy nasos stansasynyń 5 jańa uńǵymasy sýdyń astynda qaldy. Laı sýdan nasos stansasynyń sý qabyldaǵysh setkasy isten shyqty.
Jalpy kúndelikti qajettilik 4300 tekshe metrden demalys kúnderi 4800 tekshe metrge deıin jetse, qazir sý baspaǵan alty uńǵymadan bar-joǵy 3360 tekshe metr sý alynady. Bul qajettilikti tolyq qamtamasyz ete almaıdy.
Kóppáterli turǵyn úılerdegi sýdyń qysymyn arttyrý úshin jeke sektorlardaǵy úılerdi ortalyqtandyrylǵan sýmen jabdyqtaý júıesinen ajyratý týraly sheshim shyǵaryldy. Óıtkeni, jeke sektordaǵy keıbir turǵyn úılerdiń aýlalarynda jer asty qudyqtary bar.
Turǵyndardyń ótinishi boıynsha sáýirdiń 10-nan bastap keste boıynsha tańǵy saǵat 04:00-den bastap 09:00-ǵa deıin, keshki saǵat 17:00-den bastap túngi 23:00-ge deıin sý berilýde.
Budan bólek, turǵyndardy taza aýyz sýmen qamtamasyz etý maqsatynda «Lesnaıa polıana», «Orıon», «Altyn Dala», «Internatsıonalnaıa», «Akademııa» shaǵynaýdandaryna sý jetkizý úshin 11 sýtasyǵysh kólik bólindi.
Eriktiler men jastar resýrstyq ortalyǵynyń mamandary joǵary qabatta turatyn zeınetkerler men múmkindigi shekteýli jandarǵa sý jetkizip berýde. Bilim berý jáne densaýlyq saqtaý nysandary shtattyq rejımde jumys isteýde.
Qazirgi kezde, sol mańdaǵy aýmaqtarda sý stansasynyń qosymsha uńǵymasyn ashý úshin burǵylaý jumystary júrgizilýde. Dál búgingi kúni aýdandyq kommýnaldyq qyzmetter men merdiger uıymdardyń kúshterimen 4 uńǵyma qazyldy. Sý basqan uńǵymalar 7-10 kúnniń ishinde qalpyna keltiriledi.
Saparyn qorytyndylaǵan aımaq basshysy Ermek Marjyqpaev Tselınograd aýdanynyń ákimi Málgajdar Tátkeevke qysqa merzimniń ishinde turǵyndarǵa turaqty sý berýdi qalpyna keltirýdi tapsyrdy.
Eske sala ketsek, QR ІІM Tótenshe jaǵdaılar komıtetiniń tóraǵasy Vladımır Bekker Qosshyda aýyz sý máselesi 3-4 kúnde sheshiletindigi týraly jazǵan bolatynbyz.
