Qosshydaǵy aýyz sý máselesi 3-4 kúnde sheshiledi - TJK basshysy

NUR-SULTAN. QazAqparat - QR ІІM Tótenshe jaǵdaılar komıtetiniń tóraǵasy Vladımır Bekker Qosshyda aýyz sý máselesin shuǵyl sheshý múmkin emes ekenin málimdedi, dep xabarlaıdy QazAqparat tilshisi.

Onyń aıtýynsha, uńǵymalar áli sýdyń astynda tur. Sýdyń deńgeıi shamamen 1 metrdi qurap otyr. Súńgýir mamandardyń kómegine júginýge bolatyn edi. Alaıda sý ábden laılanyp ketken. Ondaıda oqys jaǵdaı oryn alýy múmkin.

«Árbir uńǵymada sý sorý qondyrǵylary bar. Qazir bir nárse istesek, uńǵymanyń ishi odan beter bitelip qalady, ishine balshyq pen tas túsedi. Ákimdik bizge xabarlasyp, súńgýir qutqarýshylardy jiberýdi suraǵan bolatyn. Biz ol jerdi kórip keldik. Biraq súńgýirlerdi jibermeýge sheshim qabyldadyq. Sebebi adam shyǵyny bolýy ábden múmkin. Sý ábden laılanyp ketken. Túk kórinbeıdi. Qudyqtar men sorǵylar bar. Súńgýir mamandar tússe, oqys jaǵdaı oryn alýy yqtımal. Sondyqtan sál kúte turý kerek. Sý ketedi. Sonda bári sheshiledi», - dedi V.Bekker elordada ótken baspasóz máslıxatynda.

Komıtet basshysynyń sózine qaraǵanda, Nura ózeninen aǵyp keletin sýdyń kólemi birtindep azaıyp keledi. Birneshe kúnniń ishinde sýdyń deńgeıi de túsedi. Ázirshe, Qosshyda aýyz sýdy naqty bir ýaqytta berý týraly sheshim qabyldandy.

«Iá, problema bar. Biraq ol jerde turǵyndarmen kelise otyryp, mynandaı sheshimge keldi. Tańerteń jáne keshke qaraı adamdardyń basym bóligi óz úılerinde bolǵanda aýyz sýdy berip otyrady. Ázirshe, solaı. Endi, 3-4 kúnde sýdyń deńgeıi túsedi. Sonda sý sorǵylaryn kóterip alýǵa múmkindik bolady», - dep atap kórsetti V.Bekker.

Aıta keteıik, QR Prezıdenti Qasym-Jomart Toqaev elordaǵa jaqyn Qosshy aýlynyń aýyz sý máselesin shuǵyl sheshýdi tapsyrdy.

Buǵan deıin TJK basshysy Vladımır Bekker ol jerdegi jaǵdaıdyń mán-jaıyn túsindirgen bolatyn.