Qosshydaǵy apat: Elektrmen jabdyqtaý jelisiniń 95 paıyzy tozǵan
KÓKShETAÝ. QazAqparat – Tselınograd aýdanynyń Qosshy aýlyndaǵy apat elektrmen jabdyqtaý jelisiniń 95 paıyzy tozýynan bolǵan, dep habarlaıdy QazAqparat tilshisi Aqmola oblystyq energetıka jáne turǵyn úı-kommýnaldyq basqarmasyna silteme jasap.
Vedomstvonyń málimetinshe, apat Qosshy aýylynyń «Lesnaıa polıana» shaǵynaýdanynda «Soltústik» qosalqy stantsııasynan bastap, 3-inshi Taratqysh transformatorly qosalqy stantsııasyna deıingi 10 kV kabel jelisinde oryn alǵan.
Sáýirdiń 22-nen 23-ne qaraǵan túni jergilikti kommýnaldyq qyzmetterdiń kúshimen kabel jelisiniń apat bolǵan tusy anyqtalyp, búlingen kabel aýystyryldy. Sáýirdiń 23-de túngi saǵat 02:10-da shtattan tys jaǵdaı rettelip, «Lesnaıa polıana» shaǵyn aýdany men jeke sektorlardaǵy turǵyn úılerge jaryq berildi.
Energetıka jáne turǵyn úı-kommýnaldyq basqarmasynan atap ótkendeı, atalmysh aýmaqta elektrmen jabdyqtaý júıesiniń qalypty jumys isteýi úshin kabel jelisine kúrdeli jóndeý jumystaryn júrgizý boıynsha jobalyq-smetalyq qujattama ázirlengen.
«Osy maqsatta ótken jyly oblystyq bıýdjetten qarjy bólindi. Elektrmen jabdyqtaý jelisiniń tozǵandyǵy eskerilip, tamyz aıynda aıaqtaý josparlanǵan qurylys-montajdaý jumystary mamyr aıyna aýystyryldy. Bul jobany júzege asyrý Qosshy aýylyndaǵy «Lesnaıa polıana» shaǵynaýdanynyń turǵyndaryn úzdiksiz elektr energııasymen qamtamasyz etýge múmkindik beredi», - dedi basqarma basshysy Ivan ıÝrchenko.
Aıtalyq, elektrmen jabdyqtaý júıesiniń tozýy saldarynan atalmysh kabel jelisinde 19-21 sáýir kúnderi de apat bolǵan. Osynyń saldarynan Qosshydaǵy birqatar turǵyn úıler jaryqsyz qalǵan edi.
