Qosshyda jyl sońyna deıin 2400 oqýshyny qamtıtyn mektep paıdalanýǵa beriledi
Bul týraly óziniń Facebook paraqshasynda QR Bilim jáne ǵylym mınıstri Asqat Aımaǵambetov jazdy, dep habarlaıdy QazAqparat.
«Búgin Aqmola oblysyndaǵy №2 Qosshy orta mektebinde boldym. Aımaqtaǵy eń problemalyq mektepterdiń biri bolǵandyqtan dál osy bilim berý uıymyn tańdadym. Bul oqý ornynda búgin 600-den astam bala mektep tabaldyryǵyn attady. Alfavıt boıynsha 1-synyptyń rettiligi «Y» árpine deıin jetedi. Bilim ordasyndaǵy oqýshy oryndarynyń sany 1200 alýshyǵa jetedi. Oqý protsesi úsh aýysymda júrgiziledi»,-dep jazdy mınıstr.
Onyń sózinshe, dál osy máseleni Memleket basshysy Qasym-Jomart Kemeluly Toqaev óziniń búgingi Qazaqstan halqyna Joldaýynda aıtty. Prezıdent atap ótkendeı, ýrbanızatsııa men demografııanyń ósýine baılanysty 2025 jylǵa qaraı oqýshy ornynyń tapshylyǵy shamamen 1 mıllıondy quraıdy. Máseleni sheshý úshin bıyl 200 jańa mektepti paıdalanýǵa berý josparlanyp otyr.
«Al, 2025 jylǵa deıin bizdiń aldymyzǵa ákimdiktermen birlese otyryp, 1 myń mektep salý boıynsha mindet qoıyldy. Aqmola oblysynyń Qosshy qalasyndaǵy mektepterdegi oqýshy ornynyń tapshylyǵy máselesine keletin bolsaq, osy jyldyń sońyna deıin bul jerde 2400 oqýshyǵa arnalǵan ári eki aýysymda jumys isteıtin jańa mektep ashylady dep josparlanyp otyr. Kelesi jyly 2400 oqýshyǵa arnalǵan eki aýysymda jumys isteıtin taǵy bir mektep ashylady. Sonymen qatar qalada 2023 jylǵa deıin taǵy birneshe mektep salý josparda bar»-dedi Ashat Aımaǵambetov.
Sondaı-aq mektepter salý jónindegi jumys barlyq óńirde ozyq qarqynmen júrgizilýi tıistigin atap ótti. Ákimdikter mektep qurylysy úshin jer ýchaskelerin aldyn ala rezervke ustap, tek maqsatty paıdalanylýyn qamtamasyz etýi qajet.
«Mektep qurylysy barysynda qoǵamdyq monıtorıngti qamtamasyz etý jáne Prezıdent tapsyrmasyn oryndaý úshin arnaıy aqparattyq portal daıyndap jatyrmyz. Ol jerde qandaı eldimekende mektep salynatynyn, qurylystyń aǵymdaǵy jaǵdaıy men barysyn kórýge bolady.
Sapaly bilim, jaıly jáne qaýipsiz jaǵdaı jasaý úshin eń aldymen materıaldyq-tehnıkalyq bazany jáne oqytý úshin sanıtarlyq normalarǵa sáıkes jaǵdaılardy qamtamasyz etý qajet ekenin túsiný qajet»,-delingen mınıstrdiń paraqshasynda.
