Qosshyda páterde tútinge tunshyqqan balalar qutqaryldy
AQMOLA OBLYSY. QazAqparat – Polıtsııa qyzmetkeriniń shıraq qımyly men turǵynnyń qyraǵylyǵynyń arqasynda tútin shyqqan páterdegi aǵaly-qaryndasty eki bala aman alyp qaldy, dep habarlaıdy QazAqparat tilshisi oblystyq PD baspasóz qyzmetine silteme jasap.
Vedomstvonyń málimetinshe, keleńsiz jaǵdaı mamyrdyń 24-de Tselınograd aýdanynyń Qosshy aýylynda bolǵan. Bul týraly Tselınograd aýdandyq PB polıtsııanyń ýchaskelik ınspektory, leıtenant Daýyl Ábirahmanovqa 23 jastaǵy Symbat Jaǵyparova esimdi turǵyn aıtyp kómek suraǵan.
«Ol ótip bara jatyp turǵyn úılerdiń biriniń 5-qabatyndaǵy ashyq turǵan terezeniń aldyndaǵy taqtaıda kishkentaı qyzdyń turǵanyn kórip, polıtsııaǵa habarlasqan. Atalǵan meken-jaıǵa dereý jetken polıtsııa qyzmetkeri páterdiń esigi ishinen qulypqa jabylǵanyna kóz jetkizgen jáne ishinen tútiniń ıisin sezgen. Tártip saqshysy jabyq turǵan esiktiń syrtynan záresi ushqan balalarǵa esikti qalaı ashý kerektigin túsindirdi», - deıdi vedomstvodan.
Tártip saqshysy kók tútin basqan páterden birinshi kezekte terezeniń aldynda turǵan 6 jasar qyzdy jáne onyń 8 jastaǵy aǵasyn qaýipsiz jerge shyǵardy. Belgili bolǵandaı, balalardyń anasy mas kúıinde gaz plıtaǵa tamaqty qoıyp, ózi uıyqtap qalǵan. Osylaısha, polıtsııa leıtenanty men beıtanys turǵyn órt aldyn alyp, balalar men onyń anasynyń ómirine arasha tústi.
