Qosshyda kórshisiniń úıinen 20 mln teńgesin urlap ketken turǵyn ustaldy

ASTANA. QazAqparat - Polıtseıler kórshileriniń úıinen 20 mln teńge urlaǵan aqmolalyqty «izin sýytpaı» ustady, – dep habarlaıdy Polisia.kz.

Aqmolalyq polıtseıler 26 aqpan kúni Qosshy qalasynda iri páter urlyǵyn tirkedi. Jábirlenýshiniń málimdemesine sáıkes, ol bir jyl boıy 20 mln teńge kóleminde aqsha jınap, jatyn bólmesinde saqtaǵan. Urlyq bolǵan kúni ótinish berýshiniń ózi de, otbasynyń basqa músheleri de úıde bolmaǵan, al oqıǵa bolǵan jerdi tekserý barysynda qandaı da bir buzyp kirý izderi tabylmady, kúdikti úıge kiltterdiń telnusqasyn paıdalanyp kirgen. Urlyq faktisin polıtseıler QR QK-niń 188-baby (Urlyq) boıynsha sotqa deıingi tergep-tekserýlerdiń biryńǵaı tiziliminde tirkedi. Dereý jedel-izdestirý is-sharalaryna kiristi. Qabyldanǵan sharalardyń nátıjesinde kelesi kúni Qosshy qalasynyń krımınaldyq polıtsııa bóliminiń qyzmetkerleri ótinish berýshiniń kórshisin Qaraǵandy qalasynyń aýmaǵynda qolǵa túsirdi.

Qazirgi ýaqytta urlanǵan qarajattyń bir bóligi tárkilendi.