Qosshyda 6 jasar aýtıst bala aýlada oınap júrip, joǵalyp ketken
QOSShY. QazAqparat - Aqmola oblysynyń Qosshy qalasynda joǵalyp ketken 6 jasar bala tabyldy, dep habarlaıdy QazAqparat.
Aqmola oblystyq polıtsııa departamentiniń baspasóz qyzmeti atap ótkendeı, polıtseıler aýtıst balany 15 mınýt ishinde taýyp bergen.
3 tamyz kúni Tselınograd aýdany Qosshy qalasynyń 45 jastaǵy turǵyny aýdandyq polıtsııa bóliminiń kezekshi bólimine kómekke júgindi.
Dabyl qaqqan áke aýtızmmen aýyratyn alty jasar balasy kólik jóndeıtin garajdyń janynda bolǵanyn aıtty. Jumysqa kirisken er adam balanyń qaıda ketkenin baıqamaı qalǵan.
Onyń aıtýynsha, bul jaǵdaı shamamen saǵat 12-de bolǵan. Aldymen ata-ana ózi izdegen, odan túk shyqpaǵan soń polıtsııadan kómek suraǵan.
Polıtseıler dereý jedel-izdestirý is-sharalaryn uıymdastyrdy, olarǵa qolda bar búkil kúsh-quraldar tartyldy.
Toptarǵa bóline otyryp, tártip saqshylary eldi meken aýmaǵynda izdeýge kiristi.
Qabyldanǵan sharalar nátıjesinde ýchaskelik ınspektordyń kómekshisi, aǵa leıtenant Baqtııar Tileýkenov salynyp jatqan mektep aýmaǵynan balany taýyp aldy.
Polıtsııa qyzmetkeri balanyń aıaǵynda aıaq kıim joq ekenin anyqtady.
Áriptesteriniń kómegimen polıtseı balany kóterip alyp, úıine aman-esen jetkizdi.
Tártip saqshylarynyń aıtýynsha, joǵalǵan balaǵa qatysty eshqandaı zańsyz áreketter jasalmaǵan.
Balasy tabylǵan ata-ana polıtseılerge shyn júrekten alǵys aıtty.
