Qosshyda 11 jastaǵy ul baladan koronavırýs tabyldy
NUR-SULTAN. QazAqparat – Elorda mańyndaǵy Qosshy kentende 11 jastaǵy ul baladan koronavırýs ınfektsııasy tabyldy, dep habarlaıdy QazAqparat COVID-19 taralýyna jol bermeý jónindegi vedomstvoaralyq komıssııanyń Telegram-daǵy paraqshasyna silteme jasap.
7 maýsymdaǵy málimet boıynsha, Aqmola oblysynda koronavırýs ınfektsııasynyń belgisimen 1 adam tirkelgen.
«Ol Nur-Sultan qalasyndaǵy indet oshaǵyndaǵy naýqastyń jaqyn týysymen qarym-qatynasta bolǵan. Provızorlyq statsıonarǵa oqshaýlanǵannan keıin jetinshi kúni alynǵan baqylaý testi bul naýqastyń koronavırýsty juqtyrǵanyn kórsetti. Tselınograd aýdanynyń Qosshy aýylynda turatyn, 2009 jyly týǵan ul bala bekitilgen klınıkalyq hattamaǵa sáıkes emdelý úshin Kókshetaý qalasynyń Aqmola oblystyq týberkýlezge qarsy dıspanserine jatqyzylady», delingen habarlamada.
Іndet oshaǵy bolǵan Nur-Sultan qalasyndaǵy jáne Qosshy aýylyndaǵy úıde ınfektsııaǵa qarsy sharalar jasaldy. Naýqaspen jaqyn baılanysta bolǵan adamdardy anyqtaý boıynsha sanıtarlyq-epıdemıologııalyq tekserý qolǵa alynǵan.
Aqmola oblysynda koronavırýs ınfektsııasymen jalpy 176 adam tirkelgen, olardyń ishinde 141-i jazylyp shyqqan.
