Qosshy saýnasynda áıeldi urǵan elordalyqtyń ústinen qylmystyq is qozǵaldy
KÓKShETAÝ. QazAqparat – Aqmola oblysynyń Qosshy qalasynda saýna dırektory bolǵan áıeldi soqqyǵa jyqqan 37 jastaǵy kúdikti ustaldy. Er adamnyń ústinen qylmystyq is qozǵaldy, dep habarlaıdy QazAqparat tilshisi.
Oblystyq polıtsııa departamentiniń málimetinshe, oqıǵa 2 sáýir kúni Qosshy qalasyndaǵy saýnalardyń birinde bolǵan. Osyǵan baılanysty Qylmystyq kodekstiń 293-baby 1-bóligi «buzaqylyq» boıynsha sotqa deıingi tergeý amaldary júrgizilýde.
«Áleýmettik jelide taraǵan beınejazbadaǵy azamattar saýnada bolyp, ishimdik ishken. Saǵat 07:30 shamasynda mekemeniń basqarýshy dırektory, Qosshy qalasynyń 31 jastaǵy turǵyny kelýshilerden esepshottyń tólenbeý sebebin anyqtamaqshy bolǵan. Sol kezde klıentterdiń biri áıelge qol kóterip, bas jáne dene tusynan soqqy jasaǵan», - delingen vedomstvo habarlamasynda.
Oqıǵaǵa qatysty 3 adam anyqtalǵan.
«Qosshy qalasynyń 44 jastaǵy turǵyny men 36 jastaǵy elordalyqtyń ortasha dárejedegi mas ekeni anyqtaldy. Olar aıyqtyrǵyshyna qamaldy. Al saýna dırektoryna dene jaraqatyn salǵan kúdikti - 37 jastaǵy er adam ýaqtysha ustaý ortalyǵyna qamaldy. Sotqa deıingi tergeý sharalary jalǵasýda», - dep tolyqtyrdy polıtsııa.
