Qosshy men Qoıandyda mektep salynyp jatyr

AQMOLA OBLYSY. QazAqparat - Aqmola oblysynyń ákimi Ermek Marjyqpaev Tselınograd aýdanynda salynyp jatqan jańa úsh mekteptiń qurylys jumystarymen tanysty, dep habarlaıdy QazAqparat tilshisi ákimdiktiń baspasóz qyzmetine silteme jasap.

Vedomstvonyń málimeti boıynsha, «Kazyna-SR» JShS óz qarajaty esebinen Qosshy aýylynda 400 orynǵa arnalǵan mekteptiń qurylysyn júrgizýde.

Mekeme dırektory Saıra Mataıbaevanyń aıtýynsha, 2017 jyldan qolǵa alynǵan bastapqy jobada 200 balaǵa arnalypty. Keıinnen aýyl mektepteriniń júktemesi joǵary ekendigin kórip, 400 oryndyq mektep salýǵa sheshim qabyldanǵan. Qazirgi kezde qurylys jumystarynyń 95 paıyzy oryndalǵan. Aımaq basshysy ǵımarattyń ishki jáne syrtqy kelbeti josparlarymen tanysty. Mektepte májilis zalynan bólek, kvorkıng ortalyǵy bar kitaphana, sondaı-aq úzilis kezinde demalatyn oryndar bar.

Kezdesýde merdigerlermen memlekettik-jekeshilik seriktestigi sheńberinde odan ári áriptestikti damytý máselesi talqylady.

Sonymen qatar, Qosshy jáne Qoıandy aýyldarynda 1200 oqýshyǵa arnalǵan zamanaýı mekteptiń qurylysy júrip jatyr. Qosshydaǵy mekteptiń qurylysy bıyl jazda bastaldy. Al, Qoıandy aýylyndaǵy mekteptiń ishki árileý jumystary qolǵa alynǵan. Munda mektep aýlasy abattyndyrylyp, sporttyń ár túrimen aınalysýǵa jáne tabıǵı ǵylymı tsıkl pánderinen tájirıbe ótkizýge arnalǵan 17 alań salyndy.

Al, Shubar aýylyndaǵy negizgi mektep 145 oqýshyǵa úsh aýysymda sabaq berýde. 1962 jyly salynǵan mektep ǵımaratynyń ábden tozyǵy jetipti. Kabınetteri tym tar. Bilim oshaǵynda bolyp, jaǵdaımen jiti tanysqan aımaq basshysy óskeleń urpaqqa bilim men tárbıe berip otyrǵan pedagogıkalyq ujymǵa alǵysyn bildirdi. Sondaı-aq, jobalyq-smetalyq qujattary ázirlenip, aldaǵy eki jyl ishinde aýylda jańa mekteptiń salynatyn jetkizdi.

«Jumys sapary kezinde Ermek Marjyqpaev Qosshy aýylyndaǵy kóshe-jol jelilerine júrgizilip jatqan jóndeý jumystarynyń barysymen de tanysty. Kóshe-jol jelileriniń qurylys jobasy boıynsha aýyldaǵy jalpy uzyndyǵy 21, 98 shaqyrym bolatyn 12 kóshe jóndeý jumystarymen qamtylatyn bolady. Qazirgi tańda ony segizinde jumys aıaqtalyp úlgeripti. Bıyl jylǵa Qoıandy aýylynda 7,7 shaqyrym jolǵa ortasha jóndeý jumystaryn júrgizý úshin 223 mıllıon teńge bólingen. Keler jyly taǵy 18 shaqyrym jol jóndeletin bolady. Shubar aýlynda aýyl turǵyndaryn ortalyqtandyrylǵan sýmen jabdyqtaý maqsatynda ınjenerlik jelini qalpyna keltirý jumystary júrgizilýde», deıdi oblys ákimidiginiń baspasóz qyzmetindegiler.