Qosshy men Astana arasynda júrdek avtobýstar qatynaýy múmkin
ASTANA. QazAqparat – Astana men Qosshy arasynda qoǵamdyq kólikke arnalǵan jeke jolaq paıda bolýy múmkin. Bul jaıynda Astana qalasy Sáýlet jáne qala qurylysy, jer qatynastary basqarmasy basshysy orynbasary Aıan Smaǵulovtyń redaktsııaǵa joldaǵan jaýabynda aıtylǵan, dep habarlaıdy QazAqparat tilshisi.
«Qosshy qalasy men Astana arasyndaǵy temirjol qatynasyna qatysty aıtsaq, Bas josparda Astana qalasynyń Qosshy qalasymen baılanystarynda pnevmokólik jelisi josparlanǵan. Ol bólek jolaqta uıymdastyrylýy múmkin», - dep jazylǵan jaýapta.
Degenmen, Aıan Smaǵulov bolashaqta eki qala arasynda júrdek avtobýs (BRT) qatynaýy múmkin ekenin aıtady.
«Pnevmatıkalyq dońǵalaqty kóliktiń tasymaldaý qabiletinen asatyn jolaýshylar aǵynynyń parametrlerin anyqtaıtyn tıisti tehnıkalyq-ekonomıkalyq negizdeme kezinde júrdek avtobýs qatynasyn (BRT) nemese relsti kólikti uıymdastyrý týraly sheshim qabyldanýy múmkin», - dep jazady basqarma basshysynyń orynbasary.
