Qosshy mańyndaǵy iri jol apaty: Jolaýshylar avtobýsy men kólikter soǵyldy

NUR-SULTAN. QazAqparat – Boran saldarynan elorda men Qosshy qalasy aralyǵyndaǵy jolda birneshe avtokólik jáne avtobýs soqtyǵysty, dep habarlaıdy QazAqparat tilshisi.

Áleýmettik jelidegi taraǵan vıdeoda 10-nan astam kólik Qosshy qalasy mańynda soqtyǵysqany kórinip tur. Olardyń arasynda jolaýshylar avtobýsy da bar.

Vıdeo avtory boranǵa baılanysty turǵyndardy jolǵa shyqpaýǵa keńes berip tur.

Elordalyq polıtsııa departamenti osyndaı jol-kólik oqıǵasy bolǵanyn rastady. Oqıǵa ornyna polıtsııa narıady barǵan. Osy oraıda kólik apatynyń sebebi men zardap shekkender týraly naqty aqparat qosymsha habarlanatyn bolady.

Budan buryn habarlanǵandaı, búgin boran saldarynan elorda aýmaǵynda 35 jol-kólik oqıǵasy tirkeldi.