Qosshy kentinde 600 oryndyq jańa mektep-lıtseı ashyldy
KÓKShETAÝ. QazAqparat- Elordanyń irgesindegi Qosshy aýylynda «Dara - bıznes akademııasy» mektep-lıtseıi ashyldy, dep habarlaıdy QazAqparat tilshisi.
Bilim ordasynda 600 oqýshy bilim alýda. Ǵımarat qurylysyna ınvestor - «Kazyna-SR» JShS 450 mıllıon teńge qarjy quıǵan. Ony merdiger «Silk-Road Corporation» JShS-gi 2017 jyly qolǵa alyp, bıyl aıaqtap otyr.
«Kazyna-SR» JShS dırektory Saıra Mataıbaevanyń aıtýynsha, bul jekemenshik bilim ordasy jaratylystaný-matematıkalyq baǵytta jumys isteıtin bolady. Oqýshylardy aǵylshyn tili jáne kásipkerlikke mashyqtandyrady. Jas urpaqqa sapaly bilim men sanaly tərbıe berýde muǵalimderdiń bilimdi de bilikti bolýymen birge, mekteptiń materıaldyq-tehnıkalyq jaraqtandyrylýy men ozyq oqý quraldarymen jetkilikti qamtamasyz etilýine zor mán berilip otyr. Mektep kabınetteri zamanaýı tehnologııamen jabdyqtalyp, barlyǵyna derlik ınteraktıvti taqta ornatylǵan. Barlyǵy 4-ten 11-ge deıingi 25 synyp bar.
Jańa bilim ordasynyń ashylý saltanatyna aımaq basshysy Ermek Marjyqpaev qatysyp, oqýshylar men ustazdardy osynaý qýanyshtarymen quttyqtady.
«Búgin barshamyz tarıhı oqıǵanyń kýási bolyp otyrmyz. Kúnnen kúnge elordamen qulpyryp damyp, halyq sany artyp kele jatqan Qosshy turǵyndary úshin jańa mektep-lıtseıi QR Tuńǵysh Prezıdenti kúni qarsańyndaǵy úlken syı boldy. Memleket basshysy Qasym-Jomart Toqaev óziniń Joldaýynda áleýmettik salaǵa, onyń ishinde bilim berý, medıtsına jáne halyqtyń ál-aýqatyn arttyrýǵa kóńil bólýdi tapsyrǵan edi. Búgin esigin ashqaly otyrǵan bilim ordasy Tselınograd aýdandyq máslıhatynyń depýtaty, jeke kásipker Saıra Mataıbaevanyń Prezıdent Joldaýyndaǵy mindetterdi júzege asyrýǵa qosyp otyrǵan azamattyq bastamasy», - dedi Ermek Marjyqpaev.
Aımaq basshysy atap ótkendeı, qazirgi tańda Tselınograd aýdanynda turǵyndardyń sany artqan saıyn mektepte oryn tapshylyǵy seziledi. Aǵymdaǵy jyldyń kókteminde óńirge jumys saparymen kelgen Memleket basshysy Qasym-Jomart Toqaev osy máseleni sheshý týraly naqty tapsyrma bergen bolatyn.
Bul másele, Aqmola oblysynda birtindep sheshilip keledi. Máselen, bıylǵy oqý jylynda Býrabaı aýdanynda 700 oryndyq mektep paıdalanýǵa berilse, Kókshetaý qalasynda 4 mektepke qosymsha ǵımarat salynýda.
Al, qazirgi tańda Tselınograd aýdanynyń Qoıandy, Qosshy jáne Qajymuqan aýyldarynda barlyǵy 2700 oqýshyǵa arnalǵan úsh mekteptiń qurylysy júrgizilýde.
Budan bólek, Semenovka (120 oryndyq) jáne Shubar (300 oryndyq) aýyldarynda eki mekteptiń jobalyq-smetalyq qujattary ázirlenýde.
Al, 2020-2021 jyldary Qosshy kentinde árbireýi 1200 oqýshyǵa arnalǵan taǵy eki mektep salý josparlanǵan.
Saltanatty shara barysynda aımaq basshysy Ermek Marjyqpaev pen jeke kásipker Saıra Mataıbaeva jańa mekteptiń lentasyn qıdy. Sonymen qatar, sharaǵa QR Bilim jáne ǵylym vıtse-mınıstri Bıbigúl Asylova qatysty.
Óz kezeginde aýdan turǵyndary atynan sóz sólegen Tselınograd aýdanyndaǵy «Rodına» agrofırmasy» JShS-niń bas dırektory, Qazaqstannyń Eńbek Eri Ivan Saýer ıgi isti qolǵa alǵan kásipkerge rızashylyq sezimin bildirdi.
