Qosshy qalasynyń shekarasy belgilendi

ASTANA. QazAqparat – Úkimet elorda irgesindegi Qosshy qalasynyń aýmaǵyn belgileýge qatysty qaýly shyǵardy, dep habarlaıdy QazAqparat tilshisi.

«Osy qaýlyǵa qosymshaǵa sáıkes «Aqmola oblysy Qosshy qalasynyń shekarasyn belgileý týraly» Aqmola oblysy ákimdiginiń 2022 jylǵy 23 qarashadaǵy № A-11/554 birlesken qaýlysyna jáne Aqmola oblystyq máslıhatynyń 2022 jylǵy 23 qarashadaǵy №7S-22-3 sheshimine kelisim berilsin», - delingen QR Úkimetiniń 2022 jylǵy 21 jeltoqsandaǵy №1041 qaýlysynda.

Qujat «Qazaqstan Respýblıkasynyń ákimshilik-aýmaqtyq qurylysy týraly» Zańnyń 11-baby 2-tarmaqshasyna sáıkes qabyldanǵan. Ol 10 kúnnen soń kúshine enedi.

Eske sala keteıik, 2021 jylǵy 27 shildede QR Prezıdenti Qasym-Jomart Toqaev Aqmola oblysynyń ákimshilik-aýmaqtyq qurylysyndaǵy ózgerister týraly Jarlyqqa qol qoıdy.

«Qazaqstan Respýblıkasynyń ákimshilik-aýmaqtyq qurylysy týraly» Qazaqstan Respýblıkasynyń 1993 jylǵy 8 jeltoqsandaǵy Zańynyń 9-babyna sáıkes Aqmola oblysynyń Tselınograd aýdany odan oblystyq mańyzy bar qala mártebesin alǵan Qosshy aýylyn bólý jolymen qaıta uıymdastyryldy.

Byltyr 23 tamyzda Aqmola oblysy ákiminiń ókimimen Qosshy qalasynyń ákimi bolyp Ǵaıdar Qasenov taǵaıyndaldy.

Qosymsha aıta keteıik, Qosshy qalasynyń aýmaǵy – 5 198 gektar. Qalanyń soltústik shekarasy Astana qalasynyń ákimshilik baǵynysyndaǵy aýmaqpen shektesedi. Al, batys, ońtústik jáne shyǵys jaǵy Aqmola oblysynyń Tselınograd aýdany arqyly ótedi.