Qosshy qalasy men Qabanbaı batyr aýyly arasyndaǵy jol jóndeldi
ASTANA. QazAqparat - Jolshy mamandar Aqmola oblysyndaǵy respýblıkalyq mańyzy bar R-3 «Astana-Qabanbaı batyr-Entýzıast-Kıevka-Temirtaý» (16-35 shq arasy) kúre jolynyń nashar kúıde bolǵan 19 shaqyrymdyq bóligin jóndedi. Jumystar merziminen buryn aıaqtaldy, dep jazady QazAvtoJol baspasóz qyzmeti.
Mamandar jańa asfalt jabynyn tósep, jol jıegin tyǵyzdap, jol tańba syzyqtaryn jańartty.
Jol qozǵalysyna qatysýshylardyń qaýipsizdigin qamtamasyz etý úshin «Quryltaı» turǵyn úı kesheniniń qasynda jáne Qosshy qalasyna irgeles ýchaskede 2 jańa baǵdarsham ornatyldy. Jergilikti turǵyndardyń ótinishine sáıkes «Quryltaı» turǵyn úı kesheniniń qasynda jańa aıaldama pavılony da ornatylmaq.Sonymen qatar Qabanbaı batyr aýylynyń ishimen ótetin jol bóliginde eski kóshe shamdary zamanaýı energııany únemdeıtin jaryqdıodty shamdarǵa aýystyryldy. Olar joldarda, ásirese túngi ýaqytta tıimdiligi joǵary jáne joldardy avtokólik júrgizýshileri úshin jaryq jáne qaýipsiz etedi. Bul jaıaý júrginshiler úshin de yńǵaıly.
