Qosshy aýylyndaǵy sý máselesi jyl aıaǵyna deıin sheshiledi
NUR-SULTAN. QazAqparat - QR Indýstrııa jáne ınfraqurylymdyq damý mınıstri Roman Sklıardyń el aldyndaǵy eseptik kezdesýinde Nur-Sultan qalasynyń irgesindegi Qosshy aýylyn sýmen qamtamasyz etý máselesi kóterildi, dep habarlaıdy QazAqparat tilshisi.
Kent turǵyny kópqabatty úılerde sýdyń berilýi árkelki ekenin aıtyp, bul máseleniń qashan túbegeıli sheshiletinin surady. Aýyl turǵynynyń suraǵyna jaýap bergen qurylys komıtetiniń tóraǵasy Marhabat Jaıymbetov sońǵy jyldary aýyldyń halqy jyldam ósip kele jatqanyn aıtty.
«Sońǵy 5 jylda Qosshy eldi mekeniniń halqy 2 ese kóbeıip, 50 myńǵa jetti. ıAǵnı táýligine 10 myń tekshe metr sý qajet. Al múmkindik táýlik saıyn 4,5 myń tekshe metr sý berýge jetedi. Sondyqtan, mınıstrlik sońǵy eki jylda bul máseleni sheshý úshin 2 mlrd teńge bólgen bolatyn. Ol qarjyǵa 14 uńǵyma qazylyp, 6 shaqyrym qubyr tóseldi. Sý tazartqysh nysan da salyndy. Al bıyl Ulttyq ekonomıka mınıstri 513 mln teńge bóldi. Osynyń arqasynda jyl sońyna deıin Qosshy eldi mekenin sapaly aýyz sýmen qamtamasyz etý máselesi sheshiledi degen josparymyz bar», - dedi Marhabat Jaıymbetov.
