Qosshy aýylyndaǵy aýyz sý máselesi qashan sheshiledi
NUR-SULTAN. QazAqparat - QR ІІM Tótenshe jaǵdaılar komıteti elordaǵa jaqyn Qosshy aýylynyń máselesi jaqyn arada sheshiletinin málimdedi, dep xabarlaıdy QazAqparat tilshisi.
Komıteti basshysy Vladımır Bekkerdiń aıtýynsha, ol jaqta Nura arnasynan asyp, ondaǵan aýyz sý uńǵymasyn ózen sýy alyp ketken. Ol sýdyń bári Samarqand men Sherýbaı-Nura qoımalarynan keldi. Búginde atalǵan qoımalardan jiberiletin sýdyń kólemi sekýndyna 320 tekshe metrdi qurap otyr. Al Qosshynyń mańaıyndaǵy Preobrajenskıı qoımasynan keshe sekýndyna 832 tekshe metr jiberilse, búgin atalǵan kórsetkish 815 tekshe metrge deıin azaıdy. "Osy sýdyń bári Samarqand men Sherýbaı-Nura qoımasynan jiberilip, Qosshyǵa deıin jetip otyr. Menińshe, bir aptanyń ishinde ol jerdegi jaǵdaı túzeledi. Qazir aýyz sý uńǵymalaryn basyp ketken sýdyń deńgeıi bir metrdeı bolyp tur. Bir aptanyń ishinde sý tartylady. Sol kezde uńǵymalardy iske qosyp, Qosshydaǵy aýyz sý máselesin sheshemiz", - dedi V.Bekker elordada ótken baspasóz máslıxatynda.
Aıta keteıik, keshegi brıfıngte QR ІІM Tótenshe jaǵdaılar komıtetiniń tóraǵasy Vladımır Bekker Qosshy aýylyndaǵy aýyz sý máselesin túsindirgen bolatyn. «Ol jaqta aýyz sý jınaqtaıtyn eki qondyrǵy bar. Bireýinde 6 uńǵyma, atalǵan qondyrǵy jumys istep tur. Oǵan qosa, taǵy bir qondyrǵyny salý jumystary bastalǵan bolatyn. Onda 14 uńǵyma bar. Dál osy qondyrǵynyń 9 uńǵymasyn sý basyp qaldy. Olardyń bári istemeı tur, qalǵany durys. Negizi, ol qondyrǵynyń qurylysy áli aıaqtalǵan joq. Resmı túrde paıdalanýǵa da berilmedi. Alaıda ol jerden aýyz sý turǵyn úılerge berilip turady», - deıdi V.Bekker.
Onyń sózine qaraǵanda, tártip boıynsha jańa sý qondyrǵysynyń aınalasyn topyraqpen úıip tastaý qajet. Sonda ishine sý kirmeıdi. Biraq ondaı sharalar atqarylǵan joq. «Negizi, qazir Qosshyda sý bar. Maǵan solaı baıandady. Biraq turǵyn úılerde aýyz sý joǵary qabattarǵa jetpeı jatyr. Qysym az, sol jaǵynan qıyndyq týyndap otyr», - dep atap kórsetti V.Bekker.
