Qosshy aýylynda koronavırýs juqtyrǵandar sany 40-qa jetti
QOSShY. QazAqparat - Búgin Aqmola oblysynda koronavırýs ınfektsııasyn juqtyrǵan 7 adam tirkeldi, dep habarlaıdy QazAqparat.
COVID-19 taralýyna jol bermeý jónindegi vedomstvoaralyq komıssııanyń málimetinshe, vırýsty juqtyrǵan 7 adamnyń 4-eýi buǵan deıin Nur-Sultan qalasynan anyqtalǵan koronavırýsty juqtyrǵan adammen jaqyn baılanysta bolǵan adamdar. Tselınograd aýdanynyń Qosshy aýylynda COVID-19 úı oshaǵynda 1969 jáne 1995 jylǵy áıel adamdardan, 1995 jylǵy er adamnan jáne 2017 jyly týǵan qyz baladan tabyldy.
Taǵy eki jaǵdaı atalǵan eldi mekenniń ákimshilik aýmaǵymen baılanysty. Qaýiptilik tobynan 1953 jylǵy zeınetkerden koronavırýs anyqtaldy. Sondaı-aq respıratorlyq aýrýy bar 1998 jylǵy er azamatty skrınıngtik tekserý barysynda koronavırýs anyqtaldy.
Buǵan qosa, skrınıngtik tekserý kezinde COVID-19 Arshaly aýdanynda 1998 jylǵy júkti áıeldiń aǵzasynan tabyldy.
Barlyǵy Kókshetaý qalasyndaǵy Aqmola oblystyq týberkýlezge qarsy dıspanserine jatqyzyldy. Aýrý oshaqtarynda zararsyzdandyrý jumystary júrgizilip jatyr. Sanıtarlyq-epıdemıologııalyq tergeý jumystary qolǵa alynǵan.
Oblysta koronavırýs ınfektsııasyn juqtyrǵan 142 adam tirkelgen. Onyń 126-sy - Tselınograd aýdanynda, onyń ishinde 40-ǵy - Qosshy eldi mekeninde tirkelgen. Qalǵan naýqastar Kókshetaý qalasynda jáne Aqkól, Arshaly, Egindikól, Shortandy aýdandarynda anyqtalǵan.
