Qosshy aýylynda qazandyq pen jıhaz jasaıtyn tseh órtendi
QOSShY. QazAqparat - Nur-Sultannyń janyndaǵy Qosshy aýylynda iri órt sóndirildi, dep habarlaıdy QazAqparat Tótenshe jaǵdaılar mınıstrligine silteme jasap.
28 jeltoqsan saǵat 00.22 kezinde Tselınograd aýdanynyń Aqmol aýyly №22 órt sóndirý bóliminiń baılanys pýnktine Aqmola oblysy Tselınograd aýdanynyń Qosshy aýylynda qazandyq janyp jatqany týraly habarlama kelip tústi.
Saǵat 00: 23-te oqıǵa ornyna jaqyn mańdaǵy Qabanbaı batyr aýylyndaǵy Aqmola oblysy TJD №34 órt sóndirý beketiniń órt sóndirý avtotsısternasy (araqashyqtyǵy - 18 shaqyrym) jáne Aqmol aýylyndaǵy №22 órt sóndirý bóliminiń órt sóndirý avtotsısternasy (araqashyqtyǵy - 45 shaqyrym) jiberildi.
Oqıǵa ornyna qosymsha Nur-Sultan qalasy TJD kúsh-quraldary (araqashyqtyǵy - 18 shaqyrym) jiberildi.
Birinshi bólimshe shaqyrý ornyna kelgen kezde saǵat 00.50-de (27 mınýttan keıin) jalpy alańy 750 sharshy metr qazandyq pen metall plastık jáne jıhaz buıymdaryn óndiretin tsehtyń tolyqtaı otqa oranǵany anyqtaldy.
Órtti sóndirýge jáne Nur-Sultan qalasy jáne Aqmola oblysy TJD órtke qarsy qyzmetiniń 34 qyzmetkeri men 5 órt sóndirý avtotsısternasy jumyldyryldy.
Órt saǵat 02.35-te aýyzdyqtalyp, saǵat 04.20-da sóndirildi. Qaza bolǵandar men zardap shekkender joq. Órttiń shyǵý sebebi anyqtalyp jatyr.
