Qosshy aýylynda 14 sý uńǵymasynyń qurylysy júrgizilýde-Aqmola oblysy

KÓKShETAÝ. QazAqparat - Aqmola oblysynyń Tselınograd aýdanyndaǵy Qosshy aýylyn aýyz sýmen qamtamasyz etý maqsatynda 14 uńǵymanyń qurylysy júrgizilýde, dep habarlaıdy «QazAqparat» tilshisi óńirlik kommýnıkatsııalar qyzmetine silteme jasap.

2016 jyldan bastap, Nıjneromanovsk aýylynan bastap, Qosshy kentine deıin sý qubyryn tartý jumystary júrgizilýde. Atalǵan joba boıynsha ár bireýi 1 900 tekshe metr bolatyn eki rezervýar, 14 uńǵymanyń qurylysy engizilip otyr.

Joba 2019 jyldyń sońyna deıin júzege asyrylatyn bolady. Qazirdiń ózinde úsh uńǵyma paıdalanýǵa berildi. Oǵan qosa, bakterıtsıd qondyrǵysy ornatylyp, qosymsha 1 000 tekshe metr sý alyndy.

Eske sala keteıik, osyǵan deıin «Lesnaıa polıana» massıviniń turǵyndary sý men jaryqtyń joqtyǵyna shaǵymdanǵan bolatyn.  Tselınograd aýdandyq ákimdiginiń málimeti boıynsha Qosshy kentindegi sý júıeleriniń tozyǵy jetkendikten apat oryn alyp, turǵyndar tirshilik nárinsiz qalǵan edi. Qazirgi kezde,  bul másele birtindep sheshilýde.

Al, jaryqqa keletin bolsaq, «Lesnaıa polıana» massıvindegi jaryq nysandary «Alıans Stroı Invest» JShS ıeliginde. Sondyqtan, bul nysandar Qosshy selolyq okrýgi apparatynyń esebine berilgen kezde turǵyndardyń jaryqqa qoly jetetin bolady.

Qazirgi kezde, elektr jelisi okrýg ákimdiginiń esebinde, sondyqtan problema joq.