Qosshyny Astanaǵa qosa ma: qala ákimi turǵyndardyń suraǵyna jaýap berdi
ASTANA. KAZINFORM- Qosshy qalasyn Astanaǵa qosý máselesi qala turǵyndary men elorda jurtshylyǵy arasynda ara-tura talqylanyp keledi. Osyǵan baılanysty Kazinform agenttiginiń tilshisi Qosshy qalasynyń ákimi Azamat Qapyshevten mundaı múmkindik qarastyrylyp jatqan-jatpaǵanyn surady.
Qala ákiminiń aıtýynsha, bul másele jergilikti atqarýshy organnyń quzyretine jatpaıdy.
— Bul bizdiń quzyretimizge kirmeıdi. Alaıda geografııalyq turǵydan qarasaq, Astanadan kele jatqanda joldyń eki jaǵynda da jańa turǵyn úı keshenderi boı kóterip jatyr, sondaı-aq Ulttyq sport ýnıversıteti ornalasqan. Jaqyn ýaqytta Qosshy men Astanany tek qala ataýy jazylǵan jol belgisi ǵana bólip turatyn jaǵdaıǵa jetýi múmkin, — dedi Azamat Qapyshev baspasóz týry barysynda.
Sonymen qatar ol qazirgi ýaqytta Qosshyny Astanaǵa qosý máselesi kún tártibinde joq ekenin atap ótti.
Qala ákiminiń málimetinshe, bes jyl buryn Qosshy halqynyń sany shamamen 50 myń adam bolsa, búginde turǵyndardyń naqty sany 120 myńǵa jetken.
Aıta keteıik, Astanada Qosshy men oń jaǵalaýǵa arnalǵan eki deńgeıli LRT stantsııasy salynady.
Sonymen qatar Keler jyly Qosshyda jańa elektr energııa stantsııasy salynady.
