Qosshyǵa deıingi LRT jelisi qashan aıaqtalady
ASTANA. KAZINFORM — «City Transportation Systems» kompanııasynyń basqarma tóraǵasy Asylbek Dúısebaev Qosshy baǵytyna tartylatyn LRT jelisiniń ekinshi kezeńiniń qurylysy 2027 jyly aıaqtalýy múmkin ekenin aıtty.
Onyń sózinshe, qurylys qarqyny jobanyń qarjylandyrylýyna baılanysty bolmaq.
— Tehnıkalyq turǵydan alǵanda, jobany kelesi jyldyń sońyna deıin aıaqtaýǵa múmkindik bar. Alaıda bári qarjylandyrý máselesine baılanysty. Qazir biz qarjy uıymdarymen osy joba boıynsha belsendi kelissóz júrgizip jatyrmyz. Qyzyǵýshylyq joǵary, sondyqtan bul másele oń sheshimin tabady dep oılaımyn, — dedi ol baspasóz máslıhatynda.
CTS basshysynyń aıtýynsha, jobany LRT-nyń birinshi kezeńin salǵan qytaılyq kompanııa júzege asyrady. Qarjylandyrý máselesi tolyq sheshilgenge deıin merdiger ekinshi jeliniń qurylysyn óz qarajaty esebinen júrgizedi.
Sonymen qatar ol Qosshy baǵytyna tartylatyn jeliniń naqty quny ázirge belgisiz ekenin aıtty.
— Ázirge Qosshy baǵyty boıynsha tehnıkalyq saraptama ǵana daıyn. Jaqyn ýaqytta barlyq málimet naqtylanady, — dedi Asylbek Dúısebaev.
Onyń aıtýynsha, jańa jelide qazirgi baǵyttaǵydaı LRT poıyzdary qatynaıdy. Alaıda vagondardyń dızaıny ózgerýi múmkin.
Buǵan deıin LRT qurylysynyń kelesi kezeńi Qosshy qalasy baǵytyna júrgiziletini habarlanǵan edi.
Aıta keteıik, 12 mamyr kúni LRT vagondary jýrnalısterge tanystyryldy.
Al jolaýshylar úshin jelini 16–17 mamyrda ashý josparlanyp otyr.
