Qosshyda jol jıeginen náresteniń denesi tabyldy
AQMOLA. KAZINFORM – Aqmola oblysyna qarasty Qosshy qalasynda jol jıeginen jańa týǵan náresteniń denesi tabyldy. Polıtsııa atalǵan derekke qatysty sotqa deıingi tergeý amaldaryn bastaǵanyn habarlady.
Bul týraly aqparat alǵash ret áleýmettik jelilerde tarady.
Kýágerlerdiń sózine qaraǵanda, jol shetinde jatqan pakettiń ishinen shamamen 6-7 aılyq sharananyń denesi tabylǵan.
Osy jaıtqa baılanysty oblystyq polıtsııa departamenti resmı túsinikteme berdi.
– Atalǵan derek boıynsha sotqa deıingi tergep-tekserý amaldary bastaldy. Qazirgi ýaqytta oqıǵanyń mán-jaıyn anyqtaý maqsatynda tıisti tergeý sharalarynyń kesheni júrgizilip jatyr, - dep málimledi Aqmola oblystyq PD.
Aıta keteıik, buǵan deıin Semeı qalasynda qoqys jáshiginen shaqalaqtyń denesiniń tabylýyna baılanysty qylmystyq is qozǵalǵan edi.