Qosshyda «Taza Qazaqstan» aıasynda ótken ekoploggıngige 1000-ǵa jýyq adam qatysty
ASTANA. KAZINFORM – Qosshy qalasynda respýblıkalyq «Taza Qazaqstan» aktsııasy aıasynda «Jańa qala – Taza qala» atty aýqymdy ekoploggıng uıymdastyryldy.
Bıyl Qosshy qalasy qala mártebesin alǵanyna bes jyl tolýyn atap ótýde. Bul sheshim eldi mekenniń damýyna serpin bergen strategııalyq qadam boldy. Mereıtoılyq jylǵa qala joǵary azamattyq belsendilikpen kelip otyr.
Aýqymdy is-sharaǵa myńǵa jýyq adam qatysty. Olardyń qatarynda «Amanat» partııasynyń ókilderi, qalalyq máslıhat depýtattary, kásipkerler, eriktiler jáne belsendi jastar bar. Ploggıng formaty qatysýshylarǵa dene belsendiligin naqty ıgi ispen ushtastyrýǵa múmkindik berdi – júgirý barysynda komandalar qala aýmaqtaryn qoqystan tazartty.
Aktsııanyń resmı ashylýyn Aqmola oblysy ákiminiń orynbasary Dosulan Aıtbaev jasap, ekologııalyq jaýapkershilikti qalyptastyrýdyń mańyzdylyǵyn atap ótti.
«Qurmetti jerlester, qadirli jastar! Búgin biz «Jańa qala – Taza qala» atty aýqymdy ekologııalyq aktsııa aıasynda bas qostyq. Bul sharaǵa tek qala turǵyndary ǵana emes, oblysymyzdyń túkpir-túkpirinen kelgen belsendiler de qatysýda. Osyndaı bastamalardy qoldaý – Memleket basshysy erekshe mán berip otyrǵan ıgi is», – dedi ol.
Qalanyń ár aýmaǵyn tolyq qamtý úshin qatysýshylar toǵyz topqa bólinip, árqaısysyna naqty kósheler men saıabaq aımaqtary bekitildi. Mundaı júıeli tásil qoǵamdyq keńistikterdi jedel retke keltirýge múmkindik berdi.
Qala turǵyndarynyń aıtýynsha, mundaı bastamalar ortaq iske degen jaýapkershilikti arttyryp, qalanyń damýyna árkimniń úles qosýyna jol ashady.
«Bul men úshin ózgelerge úlgi kórsetýge múmkindik. Biz jas ári kórikti qalada ómir súrip jatyrmyz, ony taza kúıinde saqtaý – bárimizdiń mindetimiz. Júzdegen adamnyń tazalyq úshin birigip eńbek etkenin kórý erekshe shabyt beredi», – dep bólisti shara qatysýshylarynyń biri Olesıa Manjýra.
Aıta ketý kerek, «Taza Qazaqstan» jobasy bastalǵaly Qosshyda keshendi jumystar júrgizildi: tarıhı-mádenı nysandar retke keltirilip, sý aıdyndarynyń jaǵalaýlary tazartyldy, myńdaǵan kóshet otyrǵyzylyp, balalar alańdary abattandyryldy.
Búgingi ekoploggıng osy jumystardyń zańdy jalǵasy bolyp, mereıtoılyq jylda Qosshy qalasynda qorshaǵan ortaǵa uqypty qaraý mádenıetiniń qalyptasyp kele jatqanyn taǵy bir márte dáleldedi.
