Qosshyda Ónerbaev mýzyka mektebi ashylady

ASTANA. KAZINFORM — Qosshy qalasynda Nurlan Ónerbaevtyń mýzyka mektebi ashylmaq. Bul týraly ánshiniń uly Marǵulan Nurlan habarlady.

— Jaqyn arada Qosshy qalasynan óner mektebin ashqaly jatyrmyz. Birneshe qalada fılıaly bolady degen armanymyz da bar. Men ózim óner salasynda júrip, osyndaı mýzyka mektepterinde istegen soń, biraz tájirıbem bar. Sondyqtan mektepti men basqaramyn, — deıdi ol «Búgin LIVE» baǵdarlamasynda bergen suhbatynda.

Al Nurlan Ónerbaevtyń ózi mýzyka mektebi jańa jylǵa deıin jumysyn bastaýy múmkin ekenin aıtty.

— Mektep daıyn tur. Biraq áli de tehnıkalyq turǵydan tolyqtyrý kerek tustary bar. Bıyl ashyp úlgersek degen maqsatymyz bar. Jańa jylǵa deıin de ashylýy múmkin. Biz mektepti salar kezde gaz keledi dep, gazǵa beıimdep jasaǵan edik. Qosshyǵa gazdandyrý endi jetip jatyr ǵoı. Ol jerde kishkentaı balalar bilim alatyn bolǵannan keıin barlyq jaǵdaı jasalýy kerek, — deıdi ánshi.

Aıta keteıik, memleket jáne qoǵam qaıratkeri Nurlan Ónerbaev 25 qazan — Respýblıka kúnine oraı Almaty qalasynda shyǵarmashylyq kontsertin ótkizbek. Merekelik kesh 1 qarashada Shymkent qalasynda jalǵasady.

Al 17 qazan kúniAlmaty qalasyndaǵy Respýblıka saraıynda Tolqyn Zabırova tyńdarmandaryna shyǵarmashylyq kontsertin usynady.