Qosshyda naýqasqa medıtsınalyq kómek kórsetpegen feldsher 3,5 jylǵa sottaldy
KÓKShETAÝ. KAZINFORM — Qosshy qalalyq soty abaısyzda naýqastyń densaýlyǵyna aýyr zııan keltirýge ákep soqqan, naýqasqa dáleldi sebepsiz medıtsınalyq kómek kórsetpegeni úshin jedel medıtsınalyq járdem feldsherine qatysty qylmystyq isti qarady (Qylmystyq kodekstiń 320-babynyń 2-bóligi).
Aqmola oblystyq soty baspasóz qyzmetiniń málimetinshe, sot úkimin jarııalaıtyn kezde oblystyq jedel medıtsınalyq járdem stantsııasynyń, Aqmol qosalqy stantsııasynyń jáne Qosshy qalasy emhanalarynyń medıtsına qyzmetkerleri sol jerde qatysyp otyrǵan.
Sotta anyqtalǵandaı, feldsher júrek aýyrýyna shaǵymdanǵan azamatshanyń úıine shaqyrý boıynsha kelip, tıisti medıtsınalyq kómek kórsetpegen jáne naýqasty aýrýhanaǵa jetkizip, jatqyzýdan bas tartqan.
Keıin naýqas medıtsınalyq kómek alý úshin aýrýhanaǵa óz betinshe barýǵa májbúr bolǵan. Aýrýhanada oǵan «Júrektiń ıshemııalyq aýrýy. Mıokard ınfarktisi. Stentteý. Kardıogendi shok. Klınıkalyq ólimnen keıingi jaǵdaı» dıagnozdary qoıyldy.
«Sotta feldsherdiń kinási saraptama qorytyndysymen, jábirlenýshiniń, kýágerlerdiń aıǵaqtarymen, jedel medıtsınalyq járdem feldsherine patsıentti aýrýhanaǵa shuǵyl jetkizýdi kózdegen normatıvtik quqyqtyq aktilermen jáne istiń basqa da materıaldarymen dáleldendi», — dedi vedomstvodan.
Jaza taǵaıyndaýda sot kináliniń jas bolýyn, qylmysty alǵash ret jasaǵanyn nazarǵa aldy.
«Sot úkimimen kinálige medıtsınalyq qyzmet kórsetý quqyǵynan aıyra otyryp, 3 jyl 6 aıǵa bas bostandyǵyn shekteý jazasy taǵaıyndaldy. Sonymen qatar, sot abaısyzda naýqastyń densaýlyǵyna aýyr zııan keltiretin jedel medıtsınalyq járdem qyzmetkerleriniń medıtsına salasyndaǵy normatıvtik quqyqtyq aktilerdi óreskel buzýshylyǵyna nazar aýdaryp, oblystyq densaýlyq saqtaý basqarmasyna tıisti sharalar qabyldaý úshin jeke qaýly shyǵardy. Sot aktileri zańdy kúshine engen joq», — dep tolyqtyrdy Aqmola oblysy sotynyń baspasóz qyzmetinen.
Aıta ketsek, budan buryn Aqmola oblysynda naýqastyń shaǵymyn burmalaǵan feldsher sottalǵanyn jazǵan edik.
