Qosshyda qarýlanǵan jasaq júr — polıtsııa túsinik berdi
ASTANA. KAZINFORM – Áleýmettik jelide kóshede qarýlanǵan, oq ótpeıtin qorǵanys quraldaryn kıgen polıtseılerdiń vıdeosy tarady. Jelidegi vıdeoǵa qatysty Aqmola oblystyq polıtsııa departamenti túsinik berdi.
— 2025 jylǵy 28 naýryzda Qosshy qalasynyń aýmaǵynda arnaıy, quqyq qorǵaý jáne jergilikti atqarýshy organdardyń qatysýymen antıterrorlyq oqý-jattyǵý ótkiziledi. Osyǵan baılanysty turǵyndardy sabyrlyq saqtaýǵa, qaýipsizdik sharalaryn ustanýǵa jáne oqý-jattyǵýǵa qatysatyn quqyq qorǵaý organdary ókilderiniń zań talaptaryn oryndaýǵa shaqyramyz, — degen jaýap aldyq departamentten.
Osy oraıda oqý-jattyǵý kezinde kólik qozǵalysy ishinara shektelýi múmkin.
— Ótkiziletin is-sharaǵa jáne ýaqytsha bolatyn qolaısyzdyqtarǵa túsinistikpen qaraýlaryńyzdy suraımyz, — delingen habarlamada.
Eske sala ketsek, jyl saıyn el óńirlerinde lańkestikke qarsy oqý-jattyǵý ótip turady.
Aıta keteıik, taıaýda ótken qaýipsizdik keńesinde Prezıdent mınıstrlikter jumysyn synǵa alǵan bolatyn.