Qosshyda elektr jaryǵynyń jıi sóný máselesi qalaı sheshilip jatyr

ASTANA. KAZINFORM – Qosshy qalasynda elektr jelileri paıdalanýǵa berilgen kezde memlekettik menshikke de, kepildi jetkizýshi kompanııaǵa da berilmegendikten, búginde turǵyndar úshin birqatar qolaısyzdyqtar týyndap otyr.

Atap aıtqanda, qala turǵyndaryn jıi mazalaıtyn másele – elektr jaryǵynyń jıi óshirilýi.

Aqmola oblysy energetıka jáne TKSh basqarmasynyń basshysy Baqytbek Japaevtyń aıtýynsha, «Lesnaıa polıana» shaǵyn aýdanynda kópqabatty úılerdi turaqty elektrmen qamtý úshin 666 mln teńge bólingen. Buǵan deıin bul úıler ýaqytsha elektr qýatymen qamtamasyz etilip kelgen.

– Qosshyda shynymen jaryq óshiriledi, mundaı másele bar. Birinshi, ekinshi, úshinshi kezektegi elektr jelileri paıdalanýǵa berilgende olardy memlekettik menshikke de, AREK-ke de ótkizbegen. Sondyqtan jeliler TKSh balansynda qalyp qoıdy. Qazir AREK shart mynadaı qoıyp otyr: jelilerdi qalpyna keltirip, talaptarǵa saı etip, sodan keıin ózderine óteýsiz senimgerlik basqarýǵa alý. Qazir Qosshy qalasynyń ákimdigi osy jumystardy júrgizýde, – dep túsindirdi ol.

Sonymen qatar, turǵyndardy aldaǵy jylytý maýsymyna daıyndyq ta tolǵandyrýda.

– Qalada 15 derbes qazandyq bar. 9 qyrkúıekte onyń 14-i daıyn bolsa, búgingi tańda ákimdiktiń málimetinshe, barlyq qazandyq 100% daıyn. Sondaı-aq tórt kommýnaldyq qazandyq ta jańa maýsymǵa tolyq ázir. Kómir qory jetkilikti. Jalpy, qazirgi tańda Qosshy 100% jylytý maýsymyna daıyn deýge bolady, – dedi Baqytbek Japaev.

Buǵan deıin Petropavlda 24 qyrkúıekten bastap jylytý maýsymy bastalatyny habarlanǵan bolatyn.