Qosshyda balalar mingen shaǵyn avtobýs apatqa ushyrady
ASTANA. KAZINFORM – Shaǵyn avtobýsta bolǵan 10 balanyń jeteýi Astana qalasyndaǵy aýrýhanaǵa jetkizildi.
Aqmola oblystyq Polıtsııa departamenti baspasóz qyzmetiniń málimetinshe, jol apaty 2025 jyldyń 9 sáýirinde bolǵan.
- Tańerteńgi saǵat 7-ler shamasynda Qosshy qalalyq polıtsııa bólimine «Lesnaıa polıana» turǵyn alabyndaǵy №2 úıdiń janynda jol-kólik oqıǵasy bolǵany týraly aqparat kelip tústi, aldyn ala málimet boıynsha, onda jas balalar zardap shekken bolýy múmkin. Polıtsııa qyzmetkerleri dereý oqıǵa ornyna shyqty, - dep habarlady vedomstvo.
Aldyn ala málimet boıynsha, jergilikti dúkenderdiń biriniń janynda «Iveko» avtobýsy men «Toıota» shaǵyn avtobýsy soqtyǵysqan. «Toıota» shaǵyn avtobýsy ınertsııamen avtobýs pavılonyna soǵylǵan. Shaǵyn avtobýsta balabaqshaǵa shyqqan barlyǵy 10 bala boldy. Polıtsııanyń málimetinshe, olardyń jeteýi tekserý úshin Astanadaǵy aýrýhanaǵa jetkizilgen.
- Oqıǵa ornynda apattyń naqty mán-jaıyn jáne kinálilerdi anyqtaý úshin barlyq qajetti shara qabyldanyp jatyr, - dep qosty vedomstvo.
Barlyq bala mamandardyń keshendi tekserýinen, sonymen qatar rentgen, tomografııa jáne ÝDZ ótti.
Astana qalalyq qoǵamdyq Densaýlyq saqtaý basqarmasynyń habarlaýynsha, Qosshy qalasyndaǵy «Lesnaıa polıana» turǵyn alabynda «Ańyz» dúkenine qarama-qarsy jerde bolǵan jol-kólik oqıǵasy saldarynan bes bala №2 qalalyq kópsalaly balalar aýrýhanasyna jetkizildi. Barlyq naýqas keshendi tekserýden ótti, onyń ishinde kezekshi mamandar: reanımatolog, neırohırýrg, travmatolog jáne hırýrg tekserýinen ótti.
- Medıtsınalyq tekserýdiń qorytyndysy boıynsha tórt balaǵa qajetti kómek kórsetilip, ambýlatorlyq emdeýge jiberildi. Bir bala odan ári baqylaý úshin jansaqtaý bólimine jatqyzyldy, - dep habarlady vedomstvo.
Dárigerler zardap shekkenderdiń jaǵdaıyn baqylaýdy jalǵastyryp jatyr.
Qosshy qalasyna jańa ákim taǵaıyndalǵanyn jazǵan bolatynbyz.