Qosshyda 500 úı sibir jarasy kómilgen jerge jaqyn salynǵan: qaýip bar ma
ASTANA. KAZINFORM — Aqmola oblysynyń Qosshy qalasyndaǵy «Taza bulaq» aýdanynda 500-den astam úı sibir jarasy kómilgen orynnyń mańynda ornalasqany týraly aqparat turǵyndardyń alańdaýshylyǵyn týǵyzdy. Qala ákimdigi men oblystyń bas veterınar dárigeri qaýipti nysannyń qaı jerde ornalasqanyn jáne nelikten jergilikti turǵyndarǵa qaýip tóndirmeıtinin túsindirdi, dep habarlaıdy Kazinform agenttiginiń tilshisi.
Áleýmettik jelilerde Qosshy qalasynyń «Taza bulaq» aýdanyndaǵy 500-ge jýyq úı sibir jarasy kómilgen orynnyń ústine salynǵany týraly aqparat taralyp, jergilikti turǵyndardy alańdatty.
Osyǵan baılanysty Qosshy qalasynyń ákimdigi túsinikteme berdi.
— Qosshy qalasynyń «Taza bulaq» aýdanynda tarıhı esepke alynǵan nysan bar, ol týraly málimetter esep qujattarynda kórsetilgen. Qolda bar derekterge sáıkes, bul oshaq 1986 jylǵy 28 tamyzda tirkelgen. Atalǵan aýmaq aýrý maldyń ushasyn múshelegen oryn bolǵan, — dep habarlady ákimdik.
Alaıda bul nysannyń sanıtarııalyq-qorǵaý aımaǵyna qatysty máseleniń ózindik quqyqtyq tarıhy bar. Buǵan deıin sanıtarııalyq-qorǵaý aımaǵy 2010 jáne 2014 jyldary Tselınograd aýdany ákimdiginiń qaýlylarymen belgilengen. 2021 jyly bul qaýlylar Qazaqstan Respýblıkasynyń «Halyq densaýlyǵy jáne densaýlyq saqtaý júıesi týraly» kodeksiniń erejelerin eskere otyryp, prokýratýranyń sheshimimen kúshin joıǵan.
— Sanıtarııalyq-epıdemıologııalyq salamattylyq salasynda memlekettik baqylaý men qadaǵalaýdy júzege asyratyn laýazymdy tulǵalarǵa qoldanystaǵy nysandar úshin aldyn ala sanıtarııalyq-qorǵaý aımaqtaryn belgileý, olardyń kólemin aıqyndaý jáne belgilengen kólemin ózgertý ókilettigi berilgeni anyqtaldy, — dep túsindirdi ákimdiktegiler.
Qosshy qalasy ákimdiginiń málimetinshe, qazirgi ýaqytta atalǵan aýmaqqa irgeles jerde 500-den astam turǵyn úı ornalasqan. Sonymen qatar 2021 jyldan beri Qosshy qalasy men Taıtóbe aýylyndaǵy osy nysannyń sanıtarııalyq-qorǵaý aımaǵy sheginde turǵyn úı salýǵa, jeke qosalqy sharýashylyq júrgizýge, baý-baqsha ósirýge jáne kommertsııalyq nysandar ornalastyrýǵa jer telimderi berilmegen.
— Qosshy qalasyndaǵy sibir jarasy kómilgen orynnyń shartty aýmaǵy kólemi 3 × 5,5 metr bolatyn beton sarkofagpen qorshalǵan. Qorshaýǵa «Sibir jarasy» degen jazýy bar taqtaısha ornatylǵan. Jer ýchaskesi 2017 jylǵy 31 mamyrdaǵy № AN 0236029 turaqty jer paıdalaný quqyǵyn berý týraly aktiniń negizinde zańda belgilengen tártippen rásimdelgen. Tıisti málimetter Qazaqstan Respýblıkasynyń Memlekettik jer kadastrynyń avtomattandyrylǵan aqparattyq júıesine engizilgen. Aqmola oblysynyń sanıtarııalyq-epıdemıologııalyq baqylaý departamenti sanıtarııalyq jaǵdaıy qolaısyz eldi mekender aýmaǵyndaǵy belgili sibir jarasy kómilgen oryndarǵa jyl saıyn monıtorıng júrgizip, topyraq synamalaryn alady. Zerthanalyq zertteýlerdiń nátıjeleri teris, — dep tolyqtyrdy vedomstvo ókilderi.
Aqmola oblysy veterınarııa basqarmasynyń basshysy Talǵat Júnisovtiń aıtýynsha, Taıtóbe men Qosshy aýmaǵynda sibir jarasy kómilgen eki oryn bar.
— Qosshy qalasynyń aýmaǵynda 1986 jyly paıda bolǵan sibir jarasy kómilgen oryn bar. Ol Sarqyrama ózeniniń mańynda, turǵyn úılerden 40–50 metr qashyqtyqta jáne «Taza bulaq» demalys aımaǵyna jaqyn ornalasqan. Kezinde bul jerde maldyń ushasy múshelenip, terisi kómilgen. Keıin maldyń sibir jarasymen aýyrǵany anyqtalǵan. Veterınarııalyq qyzmet osy oryndy sibir jarasy kómilgen jer retinde belgilegen. 2021 jyly ol jerge beton sarkofag ornattyq. Odan sibir jarasynyń eshqandaı batsıllasy taralmaıdy, qaýip joq, — dedi ol.
Onyń sózinshe, úılerdiń nelikten osy orynǵa jaqyn salynǵanyn sanıtarııalyq-qorǵaý aımaǵynyń buryn belgilenbeýimen túsindirýge bolady.
— Buryn sanıtarııalyq-qorǵaý aımaǵy bolmaǵan deýge bolady, sondyqtan mundaı kórshilikke ruqsat etilgen. Keıin 1 000 metrlik sanıtarııalyq-qorǵaý aımaǵy belgilendi. Sodan beri biz sibir jarasy kómilgen orynnan 1 000 metrden az qashyqtyqta qurylys júrgizýge ruqsat beretin anyqtamalardy bermeımiz. Alaıda buǵan deıin salynǵan nysandar sol jerde qaldy. Іs júzinde olar sarkofagtyń janynda ornalasqan. Biraq, joǵaryda aıtqanymdaı, odan eshqandaı qaýip joq, sondyqtan alańdaýǵa negiz joq, — dep túsindirdi oblystyń bas veterınar dárigeri.
Buǵan deıin habarlanǵandaı, Jambyl oblysynyń bir aýdanynda Sibir jarasynyń 27 oshaǵy saqtalǵan.
