Qosshyda 370-ten astam úlesker kópten kútken páterine qol jetkizdi

ASTANA. KAZINFORM – Qosshy qalasynda «Sırenevyı sad» («Yntymaq») turǵyn úı keshenindegi 371 páter paıdalanýǵa berildi. Onyń 261-i áleýmettik osal toptaǵy kezekte turǵan azamattarǵa tabystaldy, dep habarlaıdy Aqmola oblysynyń prokýratýrasy.

Buǵan deıin, bir aı buryn, óz páterin 11 jyldan astam ýaqyt kútken úleskerlerge 104 páterdiń kiltteri tapsyrylǵan bolatyn.

Qurylystyń toqtap qalýyna burynǵy qurylysshynyń zańsyz áreketteri sebep bolǵan. Kompanııa basshysy úleskerlerdiń 918 mln teńgesin jymqyryp, 8 jylǵa bas bostandyǵynan aıyryldy.

Jobany aıaqtaýdy «KGS Saýda» JShS ınvestor-kompanııasy qolǵa aldy. Kelisim Qosshy qalasy prokýratýrasynyń bastamasymen memleket menshigine qaıtarylǵan 3,2 gektar jerdi berý arqyly iske asyryldy.

Nátıjesinde úleskerlerdiń buzylǵan quqyqtary qorǵalyp, júzdegen otbasy kópten kútken baspanaǵa qol jetkizdi.

Aıta keteıik, Astanada úleskerler 4 mlrd teńge quıǵan turǵyn úı súrildi.