Qosshy mańynda shatyr quryp, demalys uıymdastyrǵan erli-zaıyptyny qutqarýǵa týra keldi

ASTANA. KAZINFORM – Aqmola oblysynyń qutqarýshylary Nura ózeniniń boıynda shatyr quryp, kóńildi demalys ótkizgisi kelgen erli-zaıyptylardy qutqardy.

QR Tótenshe jaǵdaılar mınıstrligi baspasóz qyzmetiniń usynǵan málimetine súıensek, 1968 jáne 1966 jyly týǵan erli-zaıyptylar Qosshy qalasynyń Taıtóbe aýylynyń mańynda shatyr qurǵan. Kóńildi demalys kópke sozylmady. Nura ózeni arnasynan asyp, jaıylǵan sý jubaılardyń záresin aldy. Qurǵaq jer dep tańdalǵan otyrys orny áp-sátte shaǵyn kólge aınalyp shyǵa kelgen.

Kómek suraǵan jubaılardy Aqmola oblysynyń qutqarýshylary jedel jetip qutqaryp aldy. Erli-zaıyptylar Qosshy qalasyndaǵy týystarynyń úıine jetkizildi.

Esterińizge salsaq, bıyl Qosshy qalasyna jaýyn-shashyn mólsheri ótken jylmen salystyrǵanda eki ese kóp tústi. Ol azdaı, ótken kúz jańbyrly boldy. Al 20 naýryzdan bastap kúnniń kúrt jylyp, qardyń erýine baılanysty birqatar úıge qarǵyn sý qaýip tóndirip, sý tasqynynyń aldyn alý boıynsha qurylǵan jedel shtab táýlik boıy jumys rejımine kóshti.

Aqmola oblysyna qarasty Qosshy qalasy, Taıtóbe aýylynyń irgesin sý basyp qaldy. Nura ózeniniń arnasynan asqan sý aýyl irgesinen jóńkile aǵyp jatqanyn jazǵan bolatynbyz.

Sý resýrstary jáne ırrıgatsııa mınıstri Nurjan Nurjigitov Úkimet otyrysynda Astana irgesindegi úsh eldi mekenge Nura ózeninen tasqyn qaýpi tónip turǵanyn baıandaǵan bolatyn.