Qosshy kásipkerleri jer ýchaskesin satyp alýda ákimshilik kedergilerge tap bolǵan

KÓKShETAÝ. KAZINFORM - Qosshy qalasynyń kásipkerleri sheneýnikter qurǵan ákimshilik kedergilerdiń saldarynan jer ýchaskesin satyp ala almaǵan.

Memlekettik qyzmet isteri agenttiginiń Aqmola oblysy boıynsha departamentiniń málimetinshe, kásipkerler arasynda suranysqa ıe memlekettik qyzmetterdiń biri «jer ýchaskesiniń kadastrlyq (baǵalaý) qunyn anyqtaý» bolyp tabylady. Ádette, ony jalǵa alynǵan jer ýchaskelerin maqsatty ıgergen jáne olardy satyp alǵysy keletin kásipkerler paıdalanady. Mundaı ýchaskeler jergilikti ókildi organdardyń sheshimderimen bekitiletin bazalyq mólsherlemeler boıynsha satyp alynady.

«Ákimshilik-aýmaqtyq ózgerister barysynda Tselınograd aýdany men Qosshy qalasynda jergilikti ókildi organnyń tıisti sheshimi bolǵan joq, sonyń saldarynan Memlekettik korporatsııanyń jergilikti bólimderi azamattarǵa memlekettik qyzmet kórsetýden bas tartýǵa májbúr boldy. Bul jaǵdaılar óz qyzmetin damytýdy josparlaǵan, banktik qaryzdar alýǵa, jer ýchaskelerine jeke menshik quqyǵyn resimdeýge nıet bildirgen kásipkerlik sýbektileri úshin kedergi boldy», — dep túsindirdi vedomstvo ókilderi.

Aıta ketsek, memleketten jer ýchaskelerin satyp alý bıýdjetti aıtarlyqtaı tolyqtyrady.

Departament memlekettik korporatsııanyń fılıalyna ótinish berýshilerdiń buzylǵan quqyqtaryn qalpyna keltirý týraly aqparattyq hat engizip, memlekettik organdarǵa Qosshy qalasy boıynsha bazalyq stavkalardy bekitý qajettigi týraly habarlaǵannan keıin bazalyq stavkalar bekitildi. Osynyń arqasynda 2023 jyly 22 azamat óz jer ýchaskelerin aldy.

Eske sala keteıik, budan buryn Aqmola oblysynda polıtsııa bólimi bastyǵynyń orynbasary alaıaqtyq jasaǵanyn jazǵan edik.