Qosshy qalasynda horeografııa sabaǵynda 10 jastaǵy qyz bala kóz jumdy

ASTANA. KAZINFORM – Qaıǵyly oqıǵa Aqmola oblysy Qosshy qalasynyń qoǵamdyq mádenı-sport kesheninde ótken horeografııa sabaǵy kezinde bolǵan.

Sabaq ústinde balanyń kenetten jaǵdaıy nasharlaǵan. Janyndaǵylar birden jedel járdem shaqyrǵanymen, balanyń ómirin saqtap qalý múmkin bolmady.

Aqmola oblystyq Densaýlyq saqtaý basqarmasynyń málimetinshe, 29 qańtar kúni saǵat 16:18-de Qosshy qalasynan №152 jedel járdem qyzmetine shaqyrtý túsken. Shaqyrtýdyń sebebi – balanyń basy aýyryp, júregi aınyǵan.

– Qońyraý shalýshynyń aıtýynsha, jaraqat bolmaǵan, dene qyzýy kóterilmegen, qurysyp qalý/qaltyraý belgileri baıqalmaǵan. Ómirine tikeleı qaýip tóndiretin belgiler bolmaǵandyqtan, shaqyrtý tórtinshi jedeldik sanatyna jatqyzyldy. Shaqyrtý 16:34-te qabyldanyp, sol sátte mobıldi brıgadaǵa joldandy. Brıgada 16:35-te jolǵa shyǵyp, 16:37-de oqıǵa ornyna jetti, – dep habarlady vedomstvo.

Alaıda arada az ýaqyt ótken soń balanyń jaǵdaıy kúrt nasharlaǵany jóninde qaıta qońyraý túsken. Osyǵan baılanysty shaqyrtý ekinshi jedeldik sanatyna aýystyrylyp, №4 brıgadaǵa tapsyrylǵan.

– Anasynyń aıtýynsha, bala bronhıaldy demikpemen (astma) aýyratyn bolǵan. Jedel járdem brıgadasy jetken sátte balany anasy men ápkesi qoldaryna kóterip, jedel járdem kóligine jetkizgen. Osyǵan baılanysty dárigerler dereý reanımatsııalyq sharalardy jasady. Alaıda tekserý nátıjesinde jedel járdem kelgenge deıin bıologııalyq ólim tirkeldi. Ólimniń naqty sebebi ázirge belgisiz, – dedi medıtsına qyzmetkerleri.

Aqmola oblystyq Polıtsııa departamentiniń baspasóz qyzmeti kámeletke tolmaǵan balanyń qazasy Qosshy qalasynyń Polıtsııa bóliminde tirkelgenin málimdedi.

– Qazirgi tańda oqıǵanyń barlyq mán-jaıyn anyqtaýǵa baǵyttalǵan tergeý amaldary júrgizilip jatyr. Aldyn ala berilgen málimet boıynsha, sabaq barysynda balanyń densaýlyǵy kúrt nasharlaǵan. Tekserý nátıjesine sáıkes protsessýaldyq sheshim qabyldanady, – dep habarlady polıtsııa departamenti.

Aıta keteıik, buǵan deıin Atyraý qalasynda 13 jastaǵy bala basketbol zalynda kóz jumǵan edi.