Qosshy qalasynda halyqaralyq deńgeıdegi kolledj ashylady

BÝRABAI. KAZINFORM – Astananyń irgesindegi Qosshy qalasynda halyqaralyq deńgeıdegi kolledj ashylady. Ulttyq quryltaıdyń V otyrysynda Úkimetke osyndaı tapsyrma berildi.

- Ulttyq quryltaıdyń otyrystaryn ár oblysta ótkizýdiń utymdy tusy bar. Alqaly jıynda aımaqtyń damýyna qatysty ózekti máseleler de qaralady. Meniń tapsyrmammen búgingi basqosýǵa Aqmola oblysynyń bir top azamaty qatysyp otyr. Olardyń ishinde ardagerler, zııaly qaýym ókilderi, qoǵam belsendileri, kásipkerler men jastar bar.

Men osy aımaqtyń damýyna aıryqsha mán beremin. Sondyqtan Aqmola oblysyndaǵy keıbir bastamalar men jobalarǵa nazar aýdarǵym keledi, - degen Memleket basshysy 2025 jyl «Jumysshy mamandyqtary jyly» dep jarııalanǵanyn eske saldy.

- Jastardyń zaman talabyna saı bilim alýyn qamtamasyz etý úshin Úkimet pen oblys ákimdigi Qosshy qalasynda halyqaralyq deńgeıdegi kolledj ashýǵa kirisýi qajet. Qalanyń Astana irgesinde turǵanyn jáne turǵyndarynyń sany tez ósip kele jatqanyn eskersek, bul – óte ózekti másele, - dedi Qasym-Jomart Toqaev.

Aıta ketý kerek, quryltaıdyń paneldik sessııalary keshe bastalǵan. Ol sektsııalardyń taqyryptary azamattyq qoǵam, mádenıet, óner, rýhanııat, bilim jáne ǵylym, áleýmettik-ekonomıkalyq damý máselelerin qamtydy.