Qosshy qalasynda 100-ge jýyq otbasy qonys toıyn toılady
ASTANA. KAZINFORM - Elimizdiń eń jas qalalarynyń biri Qosshyda búgin 93 otbasy jańa baspanaǵa ıe boldy.
Kópten kútken páter kiltterin alǵandardyń qatarynda kópbalaly analar, 1 jáne 2-toptaǵy múgedekter, jetim balalar, balalaryn tárbıelep otyrǵan jalǵyzbasty ata-analar men tolyq emes otbasylar bar.
Jańa páterler Memleket basshysynyń bastamasymen júzege asyrylyp jatqan 2023–2029 jyldarǵa arnalǵan turǵyn úı-kommýnaldyq ınfraqurylymdy damytý tujyrymdamasy aıasynda satyp alyndy. Úıler Qosshy qalasynyń keleshegi zor aýdandarynda ornalasqan jáne áleýmettik nysandar men qajetti ınfraqurylymǵa jaqyn jerde salynǵan.
Aqmola oblysynyń ákimi Marat Ahmetjanov qonys toıyn toılap jatqan turǵyndardy quttyqtaı otyryp, turǵyn úımen qamtamasyz etý máselesi memlekettik organdar qyzmetiniń mańyzdy baǵyttarynyń biri ekenin atap ótti.
– Memleket basshysy qazaqstandyqtardyń ál-aýqatyn arttyrý men ómir súrý sapasyn jaqsartýǵa baǵyttalǵan áleýmettik jobalardy iske asyrýǵa erekshe nazar aýdarady. Oblysta jańa turǵyn úılerdiń qurylysy qarqyn alyp keledi. Sońǵy jyldary óńirdiń turǵyn úı qurylysyna 200 mıllıard teńgeden astam ınvestıtsııa tartylyp, shamamen 2 mıllıon sharshy metr turǵyn úı paıdalanýǵa berildi. Nátıjesinde 12 myńǵa jýyq aqmolalyq otbasynyń turǵyn úı máselesi sheshildi. Bıyl biz barlyq sanattaǵy azamattarǵa shamamen 2 myń páterdi tabystaýdy josparlap otyrmyz, – dep atap ótti M.Ahmetjanov.
– Búgin biz úıimizdiń kiltin aldyq. Otbasymyz bul múmkindik úshin el Prezıdentine alǵysyn bildiredi. Úıimizde jóndeý jumystary jasalǵany qýantady. Páterimiz jaryq ári jaıly – kir de tura ber, – dedi bes balanyń anasy Kúlshat Tokpetova.
Aıta keteıik, ótken jyldan bastap turǵyn úı máselesin sheshýdiń tásilderi ózgertilip, azamattardy baspanamen qamtamasyz etýdiń qosymsha sharalary engizildi. Respýblıkalyq bıýdjetten áleýmettik osal toptaǵy azamattar úshin 850 páter satyp alýǵa qosymsha qarajat bólindi. Atap aıtqanda, Qosshy qalasynda 180 jańa páterdiń kiltteri tabystaldy.
Sonyń nátıjesinde jyl ishinde memlekettik turǵyn úı qorynan baspana alý kezeginde turǵan 2,5 myńǵa jýyq otbasynyń turǵyn úı jaǵdaıy jaqsardy. Bul kórsetkishke 1,5 myń páterdiń qurylysy men oblystyń 10 óńirinde 850 páterdi satyp alý arqyly qol jetkizildi.
Jalpy, oblysta 661 myń sharshy metr turǵyn úı salyndy. Bul 6,3 myń aqmolalyq jańa ári jaıly páterlerge qonystandy degen sóz.
Qosshyda qoqysqa tólenetin tarıf arzandaǵanyn jazǵan bolatynbyz.