Qosshy qalasy Astanaǵa qosyla ma – oblys ákimi jaýap berdi

ASTANA. KAZINFORM – Aqmola oblysynyń ákimi Marat Ahmetjanov Jibek Joly telearnasyna bergen suhbatynda Qosshy qalasynyń keleshekte Astanaǵa qosylatyny týraly alyp-qashpa áńgimelerge jaýap berdi.

— Astananyń da, Qosshynyń da óz damý jospary bar. Qosshynyń 2035 jylǵa deıingi bas jospary bekitilgen. Men qos qalanyń qosylmaıtynyna kepildik bere almaımyn. Biraq Qosshy qalasy 2035 jylǵa deıingi jospar boıynsha  250 myń turǵyny bar eldi-meken retinde Astananyń serigi bolyp damýǵa tıis. Kóshi-qondy turaqtandyra ma degen de pikir bar. Ol úshin jumys oryndary ashylyp, jaıly turmys qalyptastyrylýy kerek. Astana men Qosshynyń aıyrmashylyǵyn azaıtýymyz kerek, — dedi ol «Ýáde» baǵdarlamasynda.

Ákimniń aıtýyna qaraǵanda, qalanyń ózinde 2010 jyldardan beri kele jatqan «Sırenevyı sad» sııaqty saqaldy qurylysqa aınalǵan úleskerlik nysandardyń máselesi sheshile bastaǵan.

— 2011 jyly bastalǵan jobanyń qazir ne basy, ne aıaǵy joq, quryltaıshylary sottalyp ketken. Bıyl sondaǵy 110 úleskerge baspana alyp berdik. Budan basqa eki úleskerdiń isi sotta qaralyp jatyr, — dedi aımaq basshysy.

Buǵan deıin habarlaǵanymyzdaı, Qosshy qalasyndaǵy saqaldy qurylysqa aınalǵan «Sırenevyı sad» turǵyn úı kesheniniń qurylysy qaıta jandanyp, 371 páter paıdalanýǵa berildi.