Kospleı, anıme jáne komıks: Comic Con Astana-nyń ekinshi kúni nesimen este qaldy

Festıval alańyna kirgennen-aq kıno, anıme men beıneoıyn keıipkerleriniń ortasyna túskendeı áser alasyz. Bir jerde qatysýshylar kostıýmderin kórsetip, kelýshilermen sýretke túsip jatsa, endi bir jerde jármeńke qyzyp tur. Sýretshilerdiń jumystary qoıylǵan buryshtar men túrli oıyn alańdarynda da adam kóp.

Qatysýshylardyń kospleıge kelý joly da ártúrli. Biri kostıýmin alǵash ret ózi jasap, birden kásibı baıqaýǵa joldama alsa, endi biri áýesqoılar arasynda baq synaýǵa daıyndalyp júr. Al Comic Con-ǵa birneshe jyldan beri keletinder úshin festıval jańa obrazdardy kórip, qyzyǵýshylyǵy ortaq adamdarmen júzdesetin orynǵa aınalǵan.

Reseıdiń Sahalın óńirinen kelgen Mıroslava Kýlygına Comic Con Astana-ǵa alǵash ret qatysyp otyr. Ol festıval aıasyndaǵy kásibı kospleı baıqaýynda Honkai: Star Rail beıneoıynyndaǵy Aglaıa keıipkeriniń obrazyn kórsetedi.

Baıqaýǵa daıyndaǵan kostıými — Mıroslavanyń óz qolymen jasaǵan alǵashqy jumysy. Buǵan deıin kospleıge qyzyǵyp júrgenimen, kostıýmdi tolyq ózi ázirlep kórmegen. Sondyqtan kásibı baıqaýǵa joldaǵan ótiniminiń qabyldanatynyna asa senimdi bolmapty.

— Kostıýmdi alǵash ret ózim jasadym. Sondyqtan ótinim bergen kezde kásibı baıqaýǵa ótemin dep oılaǵan joqpyn. Osyndaı deńgeıdegi baıqaýǵa birden qabyldanǵanyma shynymen tańǵaldym. Keshe-búgin baıqaý baǵdarlamasyn kórip, odan saıyn shabyttandym. Endi sahnaǵa shyǵatyn kezegimdi asyǵa kútip júrmin, — deıdi Mıroslava Kýlygına.

Aglaıany tańdaýy da kezdeısoq emes. Mıroslavaǵa keıipkerdiń minezi men kıim úlgisi unaǵan.

— Aglaıanyń ózine senimdi ári qaısar minezi unaıdy. Obrazy da birden kózge túsedi: altyn túster kóp qoldanylǵan, kıimi de erekshe. Sondyqtan dál osy keıipkerdiń kostıýmin jasaǵym keldi, — dedi ol.

Mıroslava Astanadaǵy Comic Con-nyń aýqymy men baǵdarlamasynyń san alýandyǵy da erekshe áser qaldyrǵan.

— Mundaı úlken festıvalge alǵash ret qatysyp otyrmyn. Buǵan deıin de festıvalderge barǵanmyn, biraq olardy mundaǵy aýqymmen salystyrý qıyn. Adam óte kóp, túrli oıyn-saýyq, dúkender men alańdar bar. Men úshin munyń bári jańa ári qyzyq, — dedi ol.

Al Almatydan kelgen Dalııa Nııazova úshin de kospleı tańsyq emes. Ol anımege birneshe jyldan beri qyzyǵyp, túrli kospleı baıqaýynda baq synap júr. Comic Con Astana-ǵa Dalııa «Qara qyzmetshi» anımesindegi Sıel Fantomhaıvtyń obrazynda kelgen.

— Anımege shamamen 2020 jyldan beri qyzyǵamyn. «Qara qyzmetshi» — alǵash kórgen anımelerimniń biri, sondyqtan men úshin orny bólek. Maǵan Sıel Fantomhaıvtyń stıli qatty unaıdy. Osy obrazdy jasap kórgim kelip júrgenine biraz boldy. Keıipkerge barynsha uqsaý úshin kógildir lınza da taqtym, — dedi Dalııa.

Ol buǵan deıin kospleı festıvalderine qatysqanymen, Comic Con Astana sekildi úlken festıvalge alǵash kelip otyr. Dalııa bul joly áýesqoılar arasyndaǵy kospleı baıqaýynda da baq synamaq.

— Munda túrli obrazdaǵy adamdar óte kóp. Jármeńke, dúkender, sýretshilerdiń jumystary da unady. Osyndaı úlken festıvalge alǵash ret kelip otyrmyn. Kospleı baıqaýlaryna ara-tura qatysamyn, bul joly da áýesqoılar arasynda baq synaımyn, — dedi ol.

Bireýler Comic Con-men endi tanysyp jatsa, Temirtaýdan kelgen Andreı Aladyshev festıvalge osymen úshinshi jyl qatarynan qatysyp júr. Onyń aıtýynsha, jyl saıyn qaıta kelýine eń aldymen mundaǵy adamdar men orta sebep bolǵan. 

— Maǵan mundaǵy atmosfera, adamdar unaıdy. Festıvalge úshinshi jyl qatarynan kelip otyrmyn. Jyl saıyn jańa áser alamyn. Óıtkeni jańa obrazdar paıda bolady, ártúrli adamdar keledi. Bir jyl ekinshisin qaıtalamaıdy, adamdar da, olardyń qyzyǵýshylyǵy da ózgerip otyrady. Sondyqtan jyl saıyn tamashalaý qyzyq, — dedi Andreı Aladyshev.

Bıyl Andreı «Betmen oralady» fılmindegi Pıngvın keıipkeriniń beınesin tańdaǵan. Bul obrazǵa qyzyǵýyna ony ekranda somdaǵan akter de áser etken.

— Osy keıipkerdiń obrazyn jasaǵym keldi. Maǵan bul keıipkerden buryn onyń rólin somdaǵan akter kóbirek unaıdy. Sondyqtan osy obrazdy tańdadym. Ásirese kostıýmdi daıyndaý barysy men sońynda shyqqan nátıje qyzyq boldy, — deıdi ol.

Festıvaldiń alǵashqy kúni Andreı kostıým kımeı, Comic Con-dy kórermen retinde aralaǵan. Onyń sózinshe, festıvalge mindetti túrde belgili bir obrazben kelýdiń qajeti joq. Ózgelerdiń kostıýmderin tamashalap, adamdarmen aralasýdyń ózi mundaǵy kóńil kúıdi sezinýge jetkilikti.

— Keshe bul sharaǵa jaı kórermen retinde keldim. Túrli kostıým kıgen qatysýshylar da, jaı tamashalap júrgender de kóp boldy. Jalpy kóńil kúı erekshe. Osyndaı ortasy úshin bul festıvalge jyl saıyn kelemin, — dedi ol.

Al festıval alańynda kospleı keıipkerleriniń qatary áli de tolyǵyp jatyr. Aldaǵy eki kúnde qatysýshylar baıqaý sahnasyna shyǵyp, daıyndaǵan obrazdaryn kópshilikke usynady.

Aıta keteıik, Comic Con Astana 9 tamyzǵa deıin jalǵasady. Festıval bastalǵan alǵashqy kúni is-sharaǵa 16 myń adam qatysqan.