Kosovonyń qazirgi premer-mınıstriniń partııasy saılaýda alda keledi

ASTANA. KAZINFORM - Kosovonyń qazirgi premer-mınıstri Albın Kýrtı óz partııasynyń saılaýda jeńiske jetkenin jarııalady, dep jazady Euronews.

Ortalyq saılaý komıssııasynyń málimetinshe, bul joly saılaýshylardyń qatysýy salystyrmaly túrde tómen – 40,59%.

Kosovodaǵy parlamenttik saılaýdyń aldyn ala nátıjeleri qazirgi premer-mınıstr Albın Kýrtıdiń partııasy alda kele jatqanyn, biraq úkimetti óz betinshe qurýǵa qajetti kópshilik daýysyna ıe emes ekenin kórsetti.

Daýystardyń 73 paıyzyn sanaǵannan keıin solshyl «Ózin ózi anyqtaý» partııasy shamamen 42 paıyz daýys jınaǵany belgili boldy.

Baspasózge bergen suhbatynda premer-mınıstr nátıje «jaqsy basqarýdyń, progressıvti jáne demokratııalyq kóshbasshylyqtyń aıǵaǵy» ekenin aıtty.

- Bizdiń koalıtsııa jańa úkimet qurady, osylaısha biz bastaǵan jumysymyzdy jalǵastyramyz, jalpy, biz kóp nárse jasaımyz, - dedi Kýrtı.

Ortalyq ońshyl Kosovo Demokratııalyq partııasy (PDK) 22,68% daýyspen ekinshi orynda, úshinshi orynda Kosovo Demokratııalyq lıgasy (17,9%) keledi.

Bul nátıjeler Kýrtıdiń partııasynyń úkimetti óz betinshe qurýyna jetkilikti emes. Bul PDK men LDK-nyń eki partııalyq koalıtsııaǵa birigýine múmkindik beredi. Kýrtı buǵan deıin oppozıtsııalyq partııalardyń kez kelgenimen yntymaqtasý múmkindigin joqqa shyǵarǵan bolatyn.

Osyǵan deıin Kosovoda «delta» shtamyn juqtyrǵandar sany kóbeıgeni týraly jazǵan edik.