Kosovoda saıası tyǵyryqqa tirelgen bılik partııasy saılaýda jeńiske jetti

ASTANA. KAZINFORM — Aldyn ala nátıjelerge sáıkes, alban ulttyq baǵyttaǵy «Vetevendose» partııasy Kosovoda ótken parlamenttik saılaýda senimdi jeńiske jetti, dep habarlaıdy VVS.

Daýystardyń 90 paıyzy sanalǵannan keıin, ataýy «ózin-ózi anyqtaý» degen maǵynany bildiretin bul partııa 50,8 paıyz daýys jınady. Bul kórsetkish partııa kóshbasshysy Albın Kýrtıge bılikte úshinshi merzimge qalýǵa múmkindik beredi.

Negizgi eki oppozıtsııalyq partııa — ońshyl-ortalyq baǵyttaǵy Kosovonyń Demokratııalyq partııasy (PDK) men Kosovonyń Demokratııalyq lıgasy (LDK) tıisinshe 20,98 paıyz jáne 13,89 paıyz daýys aldy.

Aqpan aıynda «Vetevendose» partııasy saılaýda jeńiske jetkenimen, absolıýtti basymdyqqa ıe bola almaǵan. Sodan beri Kosovo jumys isteıtin úkimetsiz qalyp otyr.

Atalǵan nátıje Kýrtıge eldi koalıtsııalyq seriktestersiz basqarýǵa jetetin oryn sanyn qamtamasyz etpeıdi. Alaıda oǵan Ulttyq assambleıadaǵy 120 orynnyń 20-sy kepildendirilgen etnıkalyq azshylyq partııalarynyń depýtattary arasynan qoldaý tabý qıyndyq týǵyzbaıdy.

Osylaısha «Vetevendose» partııasy parlamenttik saılaýda qatarynan tórtinshi márte jeńiske jetip otyr. Bul nátıje 9 aqpanda ótken aldyńǵy saılaýdan keıin Kýrtıdiń úkimet qurý áreketterin buǵattaǵan oppozıtsııalyq partııalardyń ustanymynyń negizsiz ekenin kórsetedi.

Albın Kýrtı bul nátıjeni «el tarıhyndaǵy eń úlken jeńis» dep atap, bul joly oppozıtsııalyq partııalar kedergi keltirýdiń ornyna yntymaqtastyq tanytady dep úmittenetinin málimdedi.

Eske sala keteıik, Ortalyq Afrıka Respýblıkasynda tarıhı saılaý ótip jatqanyn jazdyq. Elde bir mezgilde prezıdenttik, parlamenttik, óńirlik jáne mýnıtsıpaldyq saılaýlardy ótkizý uıymdastyryldy.